A segunda sesión do xuízo contra a maior rede dedicada ao tráfico de heroína no Noroeste Peninsular virou ao redor das declaracións dos axentes da Unidade de Delincuencia e Crime Organizado (Udyco) da Comisaría de Pontevedra, que relataron os pasos que lles conduciron ata o alixo de 56 quilos de droga que comisaron oculto nun Porsche Cayenne o Día do Pai de 2016.
Os policías da Udyco que compareceron aseguraron que o principal acusado Castor Manuel G.G. dedicábase ao tráfico de heroína en grandes cantidades en contacto con cidadáns de Europa do Leste.
Os axentes explicaron o resultado de toda unha serie de vixilancias, seguimentos e escoitas telefónicas, que arroxaron como resultado que o matrimonio formado polos veciños de Mos Castor Manuel G.G. e María del Carmen C.D. tiña un nivel de vida que non se correspondía cos ingresos que declaraban legalmente e facían continuas viaxes por todo o territorio español e desprazamentos a Turquía "unha das grandes potencias no tráfico de heroína", abundaron.
Ademais, sinalaron que este acusado adoptaba fortes medidas de seguridade na súa vida diaria, utilizaba para comunicarse móbiles portugueses e relacionábase habitualmente con persoas vinculadas co tráfico de drogas en España e Portugal.
As dilixencias de investigación da Policía concluíron no ano 2016 co comiso dun Porsche Cayenne cargado con 54 quilos de heroína valorada en 2,5 millóns de euros no mercado ilícito.
Por todo iso a Policía Nacional concluíu que Castor G.G. "se dedica única e exclusivamente ao tráfico de drogas" e non ao negocio de compravenda de coche, como el afirmou durante a súa declaración ante o tribunal.
Durante a segunda sesión do xuízo tamén declararon outros dous dos seis acusados, José R.R. e Marcos Antonio G.B., considerados por fiscal antidroga de Pontevedra, Pablo Varela, como "o último elo" deste grupo de narcotraficantes. Estes procesados só responderon as preguntas dos seus avogados defensores e negaron os feitos que lles atribúe o fiscal.
SEGUIMENTOS. Os seguimentos policiais lograron interceptar conversacións nas que falaban dos "turcos", ao que Marcos explicou que se refería a uns veciños de Noia aos que compraban vieiras nunha operación en B que realizaba para complementar a xubilación que recibía da súa etapa como axente da Garda Civil —18 anos—.
Pola súa banda, José R.R., con antecedentes penais por feitos relacionados, tamén recoñeceu coñecer a Castor G.G. e a súa esposa, pero nega calquera relación co tráfico de drogas. "Deime de alta na actividade de compravenda de coches e dedícome a iso", dixo que fixo tras saír de prisión, .
Rinush G. enfróntase á pena máis elevada, 18 anos de prisión por narcotráfico e falsidade. Para Castor Manuel G.G. o fiscal pide 17 anos e para a súa muller, 15 anos. Tamén reclama unha condena de 11 anos para o albanés Sokol R. e os galegos José R. R. e Marcos Antonio G. B..
