O marisqueo está en xaque. Os ingresos da campaña estival, unha das máis importantes do ano debido ao bo prezo que alcanza a venda de ameixa na poxa, perigan polo último peche por toxina das praias do fondo da ría de Pontevedra. Este paro mantense desde o pasado 17 de xullo. Naquela xornada, o sector tivo que devolver ao mar a mercancía recollida debido á alerta biolóxica.
Os mariscadores consultados por este xornal calculan que as perdas son de ata 900 euros. Esta cantidade corresponderíase cos sete días de traballo que tiñan pendentes o mes pasado, antes de que o Instituto para o Controlo do Medio Mariño de Galicia (Intecmar) prohibise a recollida de moluscos.
No que vai de ano, o peche dos areais por biotoxinas ascende xa a 29 días, sete máis que durante todo o 2017
A medida afecta a máis de 400 traballadores, os que faenan a pé de praia. Os que o fan á boia, isto é, en embarcacións, non se viron prexudicados pola detección de toxinas mariñas, uns organismos que serven de alimento aos bivalvos e que poden ocasionar problemas de saúde aos humanos se chegan a consumirse.
O parón polo que atravesa o sector, o segundo no que vai de verán, está a xerar certa frustración no sector. No que vai de ano, o peche dos areais por biotoxinas ascende xa a 29 días. Deles, 10 contabilizáronse o pasado mes de xuño, 17 en xullo e outros dous en agosto (contabilizando o deste venres).
A presenza de biotoxinas nos areais pontevedreses durante todo 2017 foi lixeiramente inferior: 22 xornadas.
O biólogo da lonxa de Campelo avalou o rigor das análises do Intecmar, que algúns mariscadores pon en dúbida
Algúns mariscadores chegaron a cuestionar os resultados dos informes do Intecmar, no que traballan biólogos independentes e acreditados que traballan para a Xunta. E así se fixo constar este xoves na asemblea celebrada pola confraría de pescadores de San Telmo de Pontevedra no restaurante Casa Laura, en Poio.
Na concorrida cita, o biólogo da lonxa de Campelo avalou o rigor das análises do organismo autonómico. Sen o visto e prace deste instituto, o marisqueo non poderá retomarse con todas as garantías no fondo da ría.
A reunión celebrada por unha das tres confrarías prodúcese días logo da mantida por outro dos tres depósitos de Pontevedra, o da confraría de San Gregorio de Raxó, cuxos membros tamén analizaron o peche por toxina.
Esta situación provocou unha importante caída na facturación da lonxa de Campelo. O volume de negocio reduciuse á metade durante o pasado mes pasado, concretamente nun 57,3%. En xullo, a rula poiense poxou mercancía por valor de 443.970,20 euros, a maior parte ameixa xapónica. Un ano antes, as vendas alcanzaran os 1.039.748,86 euros.
TENSIÓNS. O parón laboral non foi o único asunto que este xoves se abordou no encontro de Campelo, no que se viviu un momento entre varias mariscadoras.
O motivo da discusión entre elas foi a desaparición dun saco con 28 quilos de ameixa destinada a seméntaa. O episodio resolveuse sen máis reproches no sector, que en setembro celebra eleccións.
