A Universidade de Vigo anunciou este mércores a súa intención de pechar ao tráfico rodado o campus de Pontevedra e acometer unha reforma interior que suporá peonalizar todo este espazo.
O reitor da Universidade de Vigo, Manuel Reigosa, explicou tras reunirse co alcalde de Pontevedra, Miguel Anxo Fernández Lores, que esta actuación suporá humanizar un espazo duns 20.000 metros cadrados, creando un campus "máis vivible" e reforzando o seu carácter urbano e o seu compromiso ambiental.
Reigosa explicou que a universidade está actualmente "analizando todas as posibilidades" para acometer esta humanización, pero garantiu que o proxecto está "encamiñado" e encaixará "perfectamente" co espírito do modelo urbano pontevedrés.
En concreto, a universidade recuperará o espazo central situado entre as catro facultades que ocupan o campus da Xunqueira -Ciencias Sociais, Fisioterapia, Forestais e Ciencias da Educación e o Deporte- cunha actuación que incluirá novas zonas verdes e áreas de convivencia para toda a comunidade educativa.
Serán, en todo caso, titulacións pensadas para "fortalecer" o Campus Crea e que encaixarán "perfectamente" coa especialización escollida para este campus
O reitor avanzou tamén que a institución educativa axilizará os trámites para a cesión ao Concello dunha parcela para a construción dun skatepark, que estará preparado para acoller competicións internacionais de deportes urbanos; e estuda habilitar un pantalán para deportes náuticos.
Xa a medio prazo, segundo desvelou Manuel Reigosa, o campus de Pontevedra deberá adaptarse para a chegada de novas titulacións, unha vez que abran oficialmente as negociacións entre as tres universidades galegas e a Xunta de Galicia.
Para iso, a Universidade de Vigo proxecta construír un novo edificio que, en principio, acollería a facultade de Belas Artes e o futuro grao en Deseño e Creación, nos antigos terreos de Tafisa. Así como os novos estudos que se incorporen á súa oferta académica en Pontevedra.
Serán, en todo caso, titulacións pensadas para "fortalecer" o Campus Crea e que encaixarán "perfectamente" coa especialización escollida para este campus, vinculada coa arte, as ciencias sociais, as humanidades ou a saúde.
