O último informe do Observatorio da Igualdade da UVigo relativo a 2020 destaca que as alumnas son maioría en todos os eidos do coñecemento nesta institución académica, excepto no da enxeñaría e a arquitectura, no que representan tan só o 23% do total do estudantado matriculado. Avanzar no fomento de vocacións científicas e técnicas entre nenas e mozas antóxase imprescidible, tal e como indican desde a UVigo, para evitar que a fenda económica e salarial no futuro aínda sexa maior. Ese é o obxectivo dos premios GirlGeekCovid, unha iniciativa posta en marcha este curso pola institución académica e a Deputación de Pontevedra no marco da Cátedra Feminismos 4.0.
A entrega dos galardóns ás gañadoras tivo lugar este xoves, coincidindo coa celebración do Día Internacional da Muller e da Nena na Ciencia, malia que se levou a cabo de xeito telemático por mor da situación sanitaria. Estes galardóns recoñecen a traxectoria de catro estudantes de Ciencias e Enxeñería da UVigo. As premiadas nas categorías de Ciencias e Enxeñería foron Ana Ramírez (Bioloxía) e Iria Ollero (Enxeñería Biomédica), respectivamente, que recibiron 2000 euros. Pola súa banda, Laura Sánchez (Máster de Nanociencia e Nanotecnoloxía) e Marielena Márquez (Enxeñería de Telecomunicación) lograron un accésit, dotado con 1000 euros, nesas respectivas categorías.
O xurado valorou tanto o expediente académico (nota media do expediente ata o curso 2019/2020 igual ou superior a 7 nas titulacións da rama de Enxeñería e a 8 nas titulacións da rama de Ciencias), como a motivación das mozas. A presidenta da Deputación, Carmela Silva, destacou que estes premios "son moi necesarios porque as rapazas máis novas necesitan referentes femininos que lles expliquen a importancia de cursar estas carreiras".
Pola súa banda, o reitor da Universidade de Vigo, Manuel Reigosa, ademais de felicitar ás catro galardoadas, lembroulles que "aínda que volo pinten doutra cor, a igualdade real aínda está moi lonxe de chegar; no mundo STEM precisamos de moita xente co voso esforzo, capacidade e discurso". Tamén as reivindicou como "un exemplo e un referente".