O colectivo ecoloxista Vaipolorío comezará este domingo a súa vixésima campaña de limpeza do río Gafos que, na primeira xornada, centrarase no inicio do carreiro rural próximo ao albergue de peregrinos de Pontevedra, na rúa Otero Pedrayo. As cinco sesións programadas –ata o 30 de agosto– estarán marcadas pola "prudencia", explicou o presidente da entidade, Gonzalo Sancho, en alusión á situación sanitaria, polo que no desenvolvemento da campaña estarán "atentos ás flutuacións da pandemia".
Así, a media de participantes cada domingo estará entre as 20 e as 25 persoas, pertrechadas con máscaras, luvas e xel desinfectante para cumprir coas "mínimas condicións". As persoas interesadas en sumarse solidariamente á recollida de residuos terán que inscribirse por teléfono, dispoñible na páxina de Vaipolorío en Facebook ata o venres de cada semana por motivos de organización.
Por prudencia e en cumprimento das normas de aforamento son tamén as razóns polas que se anula a tradicional comida de convivencia coa que finalizaba cada xornada de limpeza. E precisamente, porque "as condicións non son as máis adecuadas para as celebracións", explicou o presidente de Vaipolorío, Gonzalo Sancho, decidiron "pospor para 2021" as actividades conmemorativas dos 20 anos desta campaña, pola que Vaipolorío recibiu varios premios.
No entanto, Sancho destacou o agradecemento e a homenaxe de Vaipolorío á Asociación Xoán XXIII de Pontevedra, dedicada á formación e promoción integral das persoas con discapacidade intelectual, por cumprirse "dez anos continuos" de voluntariado na campaña de limpeza do Gafos. "É un orgullo contar con este colectivo porque, ben dirixidos, fan o seu labor", asegurou Sancho.
SITUACIÓN. Sobre o estado actual do Gafos, desde Vaipolorío resaltaron que "preocupa moito" o seu baixo caudal, motivado pola seca dun "verán excesivamente atípico" en canto a pluviosidade, xa que en xuño e en xullo non choveu "nin pinga".
Ademais, Gonzalo Sancho instou á Xunta a aspirar "a que a veciñanza teña outro sistema de subministración de auga" alternativo ás captacións "legais", argumentando que "canto menos caudal hai, é canto máis tiramos da auga", polo que na asociación estarán "vixiantes" sobre o nivel da canle.
No polo oposto, Sancho asegurou que a limpeza en xeral está "bastante ben" a pesar da presenza de plásticos. Así, os aveños voluminosos e os electrodomésticos que protagonizaban as primeiras campañas de recollida de residuos "xa non" figuran entre os residuos retirados. "Socialmente avanzouse bastante" nese sentido, engadiu, aínda que "igual que unha casa, o río necesita un constante mantemento e revisión".
Así, non descarta a aparición de máscaras e outros elementos de uso cotián, en tanto "este tipo de vida fai que vivamos ao redor do plástico".
A dinámica de cada xornada -que se desenvolverá de 10 a 13 horas- irá dependendo das necesidades, explicou Gonzalo Sancho, polo que os tramos de limpeza, tanto a nivel rural como a nivel urbano e na desembocadura do río, disporanse dunha semana para outra.
