O edificio número 17 da rúa Pintor Manuel Colmeiro resulta difícil de localizar. O muro dunha parcela sepárao do resto dos inmobles do viario e convérteo nunha illa urbana.
A edificación en cuestión consta de 16 pisos nos que residen 80 persoas, entre elas Marcos Pose, que define o sentimento xeneralizado dos veciños da zona: "Vivimos no tramo de rúa máis abandonado de Pontevedra. Suponse que o Plan Urbanístico debeu darlle continuidade", subliña.
"Preocúpanos que haxa unha urxencia sanitaria que requira chamar a unha ambulancia porque non vai saber chegar ata o noso edificio, que está separado do resto da rúa", engade. "En canto ao carteiro, esperamos que non nos cambien ao que xa nos coñece porque o seu substituto tería serias dificultades para dar connosco".
Ao tratarse de "unha illa escondida" –este tramo da rúa, ao que se accede a través da avenida de Vigo, non ten saída– está a ser usada como lugar onde os cans defecan, incluso diante do propio portal do edificio número 17.
ESCRITOS. Os veciños presentaron dous escritos no Concello (hai un ano e reiterado hai catro meses) nos que expuñan ao ente municipal os problemas que, aseguran, afectan a este tramo da rúa Pintor Manuel Colmeiro, dos que aínda non tiveron resposta.
Entre as deficiencias que denuncian os residentes figura a escasa iluminación da zona, o abandono dunha leira que é "un niño de ratas" e o esborralle dun muro.
