A nova campaña de promoción turística da Deputación de Pontevedra apelará á seguridade do destino fronte á Covid-19 e á beleza das paraxes naturais da provincia para atraer un maior número de visitantes este verán.
A campaña leva por título Ven, que segundo a presidenta do ente provincial, Carmela Silva, "é unha palabra" e que anima a visitar as Rías Baixas "porque chegou o momento de facelo" e porque Pontevedra é un destino "marabilloso e absolutamente seguro" para gozar das vacacións.
📍 Este ano #VenÁsRiasBaixas, #VenAPontevedraProvincia!
🌿 #SigueOTeuInstinto e ven descubrir a nosa natureza, lugares máxicos, paisaxes que nunca esquecerás
➡️ Durante o verán promoveremos 13 rutas por interior e costa para que nos coñezas coma nunca antes pic.twitter.com/tIe4LVbk31— Deputación Pontevedra (@depo_es) July 8, 2020
"Coidamos con mimo toda a provincia durante a crise para que o turismo poida volver", sinalou a dirixente socialista, que destacou o "enorme esforzo" que está a realizar o sector para reactivar o turismo nacional.
O vídeo que acompaña a esta campaña diríxese directamente aos que queiran visitar as Rías Baixas para que "sigan o seu instinto" e durante o verán "gocen dun sitio máxico", engadiu a presidenta da Deputación.
Bosques, rías, praias, viñedos, fervenzas, faros, pazos e castelos únense nesta nova campaña promocional que, segundo Silva, "deixa claro" que para gozar dun destino "fermoso" de natureza e cunha "incrible" riqueza patrimonial e gastronómica "hai que vir ás Rías Baixas".
A primeira fase desta campaña estará destinada aos turistas nacionais e aos visitantes do norte de Portugal, fomentando así o turismo de proximidade.
Xa no outono haberá unha nova onda para que esta iniciativa chegue a zonas "estratéxicas", que Carmela Silva identificou con Madrid, País Vasco, Asturias e Castela a Mancha.