O SECTOR automobilístico é un dos máis afectados pola crise sanitaria da Covid-19. Os datos de vendas dos concesionarios relativos aos meses nos que se mantivo o estado de alarma decretado polo Goberno (desde o pasado 14 de marzo ata a actualidade) evidencian un esborralle no mercado do automóbil. Tras tocar fondo en marzo e abril, o negocio comezou a repuntar de forma tímida.
En concreto, os últimos datos que manexa o comparador de seguros de coche Acerto.com apuntan a un trompazo nas vendas de turismos e todoterreos de case o 73% durante o mes de maio. Os modelos menos afectados foron, por esta orde, o Dacia Sandero, o Renault Clio, o Audi A1, o Fiat 500 e o Seat León, que foron os máis vendidos neste período.
►O Goberno dará 4.000 euros ao comprar un coche 'Cero' e ata 800 por un de combustión
Segundo profesionais do sector consultados por Diario de Pontevedra, o número de vehículos vendidos en marzo na provincia de Pontevedra caeu un 61% con respecto a ese mesmo período de 2019 (de 1.094 operacións realizadas pasouse a 435), un esborralle que aínda foi máis notorio en abril, cunha caída nas vendas do 97% (de 1.064 coches vendidos pasouse a só seis). Houbo que esperar ao mes de maio para o inicio do repunte nas vendas, con 438 operacións fronte ás 1.138 rexistradas en maio de 2019, o que supón unha diminución no negocio dun 38% con respecto ao mesmo período do ano pasado.
Antonio García Losada, xerente de Tambo Motor (concesionario oficial da marca Seat en Pontevedra e Vilagarcía de Arousa), explica que en marzo "o mercado do automóbil caeu a cifras que non se vían en moitos anos", cun mes de abril cuxo balance foi aínda peor, cunha caída do 97%. "Foi un mes no que se matricularon os coches que se matriculan nun día en España", subliña. Foi no mes de maio cando se rexistrou unha lixeira recuperación no número de coches que saíron do concesionario de Tambo Motor, aínda que a caída foi do 64%, con 124 vehículos matriculados fronte aos 347 que se matricularon no mesmo mes de 2019.
"O mes de maio o Goberno central non nos permitiu aos concesionarios retomar as vendas ata o día 11, cando entramos na fase 1 da desescalada, e tiñamos que facelo con cita previa. á serie de limitacións coa que nos atopabamos para realizar a actividade sumouse que feito de que a xente nun primeiro momento tiña medo a que as medidas de seguridade nos concesionarios non fosen as adecuadas, un temor infundado porque os concesionarios son dos negocios máis seguros que hai porque nunca hai concentración de moita xente e as salas de vendas son exposicións de moitos metros cadrados", subliña Antonio García. Puntualiza que, no caso de Tambo Motor, a concesionario conta cun local de exposición de vehículos novos de ao redor de 800 metros cadrados. "Percibimos unha lixeira melloría nas vendas. Se se toman como referencia os últimos días de maio, afortunadamente está a crecer o número de clientes que acoden á exposición". Ademais, confía que esta tendencia se manteña o presente mesede xuño.
Os modelos de coches máis demandados da marca Seat son o León, Arona e Eivissa. "Gana peso o Arona en comparación ao ano pasado porque están de moda os modelos SUV (acrónimo que provén do inglés e significa Sport Utility Vehicle ou, traducido ao español, Vehículo Utilitario Deportivo).
MOURENTE MOTOR. Enrique Figueroa
En concreto, en abril matriculáronse 18 Skoda, "un pouco menos do que se debería nun mes normal. Iso é boa sinal. Son optimista pero aínda non estamos ao ritmo normal porque todo o mundo aínda non está ao 100% . Estou convencido de que nunhas semanas estaremos ao mesmo ritmo que o de antes da crise sanitaria. Temos previsto que o verán sexa bastante parecido ao dun ano normal, aínda que se cadra hai algunha lixeira diferenza. En canto aos modelos máis demandados en Mourente Motor destacan o Skoda Karoq, o Kamiq e o Favia, "modelos compactos", precisa Enrique Figueroa.
CELTAMOTOR E GALMOTOR. José María de Rodrigo de Diego, xerente dos concesionarios Celta Motor (BMW) e Galmotor (Ford) explica que todas as operacións de venda de vehículos que concretaran para o mes de marzo quedaron estancadas, aínda que non se rexistraron cancelacións. "Ao pechar as fábricas –que servirán os encargos en setembro e outubro– tivemos que vender aos nosos clientes vehículos en stock que se parecesen aos que elixiran. De feito, a campaña de verán afrontarémola cos coches que temos en stock", como son os SUV X1, X2, X3 e X4, de márchaa BMW.
"En marzo as vendas en Celta Motor foron dun 40% con respecto ao mesmo período de 2019, mentres que o volume de negocio rolda na actualidade o 70%", subliña o xerente. Ademais, sinala que a parálise económica que repercutiu no emprego (con moitas persoas afectadas por un Erte) tamén prexudicou ao nivel de vendas de turismos.
"A xente está a exporse comprar un coche máis pequeno e baixar un pouco as cotas mensuais. Estamos a alargar un pouco máis os financiamentos aos nosos clientes, ampliando os prazos de vencemento catro meses máis, pendentes da xente reincorpórese aos seus traballos na denominada nova normalidade", sentencia o responsable de Celta Motor e Galmotor.
Os concesionarios de automóbiles confían en que o Goberno central afrezca canto antes axudas económicas que permitan a renovación do parque automobilístico e supoñan un repunte nas vendas.
