A modernización da estación de autobuses de Pontevedra está máis cerca. Os técnicos da Xunta pecharán en breve o último contrato para a mellora da terminal. Na súa última reunión, celebrada o pasado 18 de outubro, a Mesa de Contratación propuxo a adxudicación do denominado proxecto intermodal a Extraco, Construccións e Proxectos S.A. A empresa ourensá obtivo a mellor puntuación dun concurso público que se disputaron once firmas. Delas, catro foron excluídas do proceso porque as súas ofertas incorrían en baixa temeraria.
Salvo sorpresa maiúscula, Extraco executará a actuación por 2.928.080 euros (IVE incluído), o que supón un 13,25% menos do orzado inicialmente. Disporá dun prazo de dez meses para o que, segundo os pregos, non se admitirán prórrogas.
Os traballos consistirán na reordenación do tráfico da central de autocares. Suprimirase o actual punto de entrada e saída de autobuses, situados nos laterais da estación. Tamén se creará un paso cuberto que sairá da nova praza, que estreará pavimento de lastro. A plataforma será máis elevada para que os usuarios poidan ir a pé á terminal do ferrocarril por este itinerario, que estará resgardado da choiva. A marquesiña atravesará cale Otero Pedrayo.
Extraco executará unha parte da actuación por 2,92 millóns de euros e as firmas Alea e Arines farán a outra por 2,38 millóns
A zona de aparcadoiro transformarase. As prazas para estacionar substituiranse por árbores e áreas de bica e marcha para os condutores teñan un sitio para poder deixar os viaxeiros. Nesta zona, os taxis contarán cun espazo propio e mellor sinalizado.
O recinto tamén terá un novo acceso a través dunha ponte sobre o Gafos. O ramal sairá da avenida de Josefina Arruti e conectará coa parte de atrás da estación de autobuses. A vía será de uso exclusivo para os autocares.
A dársena tamén se renovará. Ademais da reordenación da circulación no interior da terminal, as obras contemplan a mellora do pavimento.
Os traballos que levará a cabo Extraco incluirán o destape dun pequeno tramo do río Gafos, o que vai pegado a esta central de transportes.
Os traballos prevén un novo ramal desde Josefina Arruti, a humanización da praza, a conexión co tren e o destape do Gafos
SEGUNDA FASE. A segunda fase do proxecto intermodal será a rehabilitación integral da estación de autobuses, que realizarán as empresas Alea e Arines por 2.384.785,32 euros (IVE incluído). Ambas as firmas disporán dun prazo de doce meses para executar as obras, que suporán unha mellora funcional, estética e de eficiencia enerxética da instalación. Ademais da renovación da fachada, que se revestirá con aceiro branco, e da cuberta, a intervención incluirá novos sistema de información para os pasaxeiros.
A actuación prevé a ampliación do vestíbulo, que será máis luminoso, e a construción dunha rampla máis accesible para entrar á estación.
O plan intermodal custará os 5.312.865,12 euros. A Xunta financiará o 75% e o Concello o 25% restante.
