O Xulgado de Instrución 3 de Pontevedra abriu unha nova investigación sobre feitos presuntamente cometidos por Driss E.M., o mozo veciño da Boa Vila que decidiu fuxir da Policía saltando ao río Lérez o luns da semana pasada. O individuo, que estaba en procura e captura e que ingresou en prisión para cumprir unha pena por malos tratos que tiña pendente, atópase agora cunha nova fronte xudicial no que lle atribúen un delito de lesións graves (que poderían desembocar, tras a fase de Instrución, nunha imputación de homicidio en grao de tentativa) logo de golpear brutalmente a outro home no interior dun pub da rúa Sagasta cando se atopaba pechado.
Os feitos tiveron lugar no mes de xullo e desencadeáronse logo dunha rifa entre dúas mulleres que se produciu no mesmo establecemento dous días antes, segundo sinalan fontes da investigación. Aquel día, as dúas mulleres encerelláronse, unha delas tomou un cristal roto e provocoulle un corte á outra, que tivo que ser trasladada ao hospital con feridas leves. O investigado estaría relacionado coa parella da vítima desa primeira agresión, mentres que o mozo que posteriormente sería golpeado tería que ver coa muller que provocou a ferida esa noite. O caso é que dous días despois e no mesmo escenario, xa co local pechado, Driss E.M. propiciaría un brutal golpe ao citado individuo que lle provocou unha fractura de cranio e que a día de hoxe, medio ano logo do sucedido, aínda o mantén convalecente, recuperándose daquela agresión.
O investigado saltou ás primeiras páxinas de todos os xornais logo de protagonizar un intento de fuxida con poucas opcións de prosperar logo de meterse na canle do Lérez ante a presenza da Policía Local. Alí mantívose, a pesar das baixas temperaturas reinantes, máis dunha hora, consciente de que se se entregaba iría a prisión. O xefe dos Municipais fíxoo entrar en razón.
