O Xulgado do Contencioso-Administrativo número dous de Pontevedra, que dirixe a maxistrada Mónica Sánchez, desestimou o recurso dun grupo de bombeiros do Parque Municipal que reclamaban que se computase dentro da súa xornada laboral o tempo que dedicaban antes e logo de cada quenda á reunión de prevención de riscos e ao aseo persoal.
A sentenza, que este luns deu a coñecer a portavoz municipal, Anabel Gulías, rexeita a petición de 13 dos 40 traballadores que conforman o servizo de extinción de incendios de Pontevedra. Todos eles reclamaban ao Concello unha compensación económica durante os últimos catro anos polos minutos de preparación, aseo e vestiario que investían durante os días de traballo. A xuíza recorda na súa resolución que eses tempos se inclúen na xornada efectiva".
Outro xulgado, o Contencioso-Administrativo número un de Pontevedra, rexeitou a reclamación de traslado a Vigo dun bombeiro da cidade ao que o Concello olívico concedéralle a través de comisión de servizo. Este permiso foille denegado porque non contaba co obrigatorio informe do Concello da capital.
