A porta pechada celebrouse este martes a primeira sesión dun xuízo por abuso sexual na sección segunda da Audiencia Provincial de Pontevedra. O acusado é un home para o que a Fiscalía solicita once anos de cárcere como sospeitoso de abusar sexualmente en repetidas ocasións da irmá da súa muller, que era menor de idade.
Para protexer á vítima, a sala evitou o xuízo en audiencia pública neste caso que procede do Xulgado de Instrución número 3 do Porriño. A vista oral retomarase o vindeiro martes 2 de marzo coa declaración dunha persoa que acode como testemuña e que non fora debidamente citada para a xornada deste martes.
Segundo recolle o escrito de Fiscalía, os feitos remóntanse ao verán de 2016, cando a moza, que contaba con menos de 16 anos, comezou a acudir regularmente á casa que a súa irmá compartía co acusado para coidar do fillo que tiñan en común. Nunha data non determinada, en torno ao mes de xullo, e cando se atopaba soa na casa co procesado, este meteuse na cama con ela e efectuoulle tocamentos nas partes íntimas.
Os episodios repetíronse con frecuencia ata, polo menos, marzo de 2017, apunta a Fiscalía, e incluíron tocamentos, bicos e violacións completas, "aproveitando sempre a circunstancia de que a menor confiaba no acusado como marido da súa irmá, así como o feito de atoparse a soas con ela na súa vivenda".
O ministerio público considera os feitos constitutivos dun delito continuado de abusos sexuais con acceso carnal a menor de 16 anos, con agravante de parentesco, e pide para o acusado 11 anos de prisión e 12 anos de afastamento posterior da súa vítima.
Ademais, pide que se inhabilite para exercer calquera profesión ou oficio, retribuído ou non, que leve contacto regular e directo con menores de idade durante un tempo superior en cinco anos á pena de privación de liberdade que sexa imposta. En concepto de responsabilidade civil, reclama que indemnice á vítima con 10.000 euros.