A conselleira de Infraestruturas e Mobilidade, Ethel Vázquez, anunciou este luns en Pontevedra que a finais deste ano estará operativa a senda de Alba.
Ethel Vázquez supervisou os traballos de construción desta senda que reforzará a seguridade viaria de veciños e peregrinos á vez que se favorecerá a mobilidade dos condutores que van á zona industrial.
Segundo sinalou, estas obras iniciáronse a finais de xullo e avanzan "a bo ritmo" superando o 20% do proxecto en canto ás canalizacións, escavacións e recheos, e os muros de contención. Posteriormente executaranse as pavimentacións, a pasarela metálica sobre o río, a iluminación, a sinalización e a xardinería.
Vázquez agradeceu a "paciencia e comprensión" dos veciños e dos usuarios desta estrada, pois para acometer os traballos preservando a súa seguridade, foi preciso un corte da vía.
O novo itinerario discorre paralelo á estrada PO-225, entre Alba e San Caetano, nun tramo coincidente co Camiño Portugués a Santiago de Compostela no que a Xunta investiu preto de 700.000 euros.
A conselleira destacou que esta intervención é un valor engadido para acoller ao Xacobeo "máis necesario da historia". Igualmente enmarcou esta actuación entre as iniciativas que impulsa a súa Consellería para promover "unha mobilidade máis respectuosa co medio", en consonancia coa celebración da Semana Europea da Mobilidade.
A senda de Alba terá unha lonxitude de algo máis de 700 metros: pola marxe esquerda da estrada executaranse case 600 metros continuos de senda e pola dereita, o que resta, en dous tramos.
PASARELA. Para separar a senda da propia estrada, onde sexa posible disporase unha franxa axardinada. Na zona do río, executarase unha pasarela metálica peonil de algo máis de 13 metros, rectificarase unha curva e tamén se reordenará a intersección existente.
A actuación compleméntase coa drenaxe de augas pluviais e a execución de novas redes de servizos para electricidade e telecomunicacións.
Esta actuación, enmarcada no Plan de Sendas de Galicia na comarca de Pontevedra, está cofinanciada con Fondos FEDER 2014/2020.
