A conselleira do Mar, Rosa Quintana, explicou este mércores no Parlamento de Galicia que a Xunta ten a vontade de levar adiante o proxecto de dragado do río Lérez (que incluiría o tramo que transcorre desde a ponte do Burgo ata Os Praceres), pero subliñou que "supeditado ao cumprimento da lexislación e da tramitación, ao respecto ambiental e á salvagarda da actividade marisqueira da área da ría".
Quintana realizou estas declaracións en resposta a unha pregunta formulada polo grupo parlamentario do PSOE, que pediu información acerca dun proxecto que leva máis dunha década no caixón e que, segundo os socialistas, conta co aval de todos os sectores afectados: as confrarías, o club naval e o Concello de Pontevedra.
A conselleira manifestou a súa disposición para "ter listo o proxecto canto antes e poder licitalo de inmediato", pero, segundo engadiu, "coa premisa básica do consenso". Para iso, sinalou que "estamos a traballar para solucionar os puntos de discrepancia".
A titular da Consellería de Mar recordou que o proceso desta actuación reorientouse no ano 2014 para acoller, xa co primeiro estudo de impacto ambiental redactado, unha serie de cambios normativos a petición do propio sector. Isto, sinalou, carrexa novidades profundas na tramitación, obrigando, entre outros aspectos, a novas contratacións para un novo estudo de impacto ambiental.
Por outra banda, Rosa Quintana destacou que a envergadura da actuación de dragado do Lérez require unha complexa tramitación administrativa. "Tratar dunha das actuacións de dragaxe máis complexa do conxunto do sistema portuario autonómico, técnica e economicamente".
A conselleira recordou que se prevé actuar sobre 141.000 metros cadrados ao longo de catro quilómetros, e a retirada duns 221.000 metros cúbicos de materiais baixo a auga.
