A implantación do transporte público deu un novo paso. Xunta e Concello acordaron o mércores impulsar un convenio para repartir as competencias nesta materia e os custos. E, tal e como estaba previsto, a idea principal é que a Administración autonómica faga que as súas liñas interurbanas de transporte presten servizos dentro do termo municipal e que o Concello, responsable desta prestación (segundo a Lei de Bases de Réxime Local), abone a parte do financiamento que lle corresponde.
O acordo foi adoptado nunha primeira reunión técnica celebrada en Santiago, entre a Dirección xeral de Mobilidade e técnicos municipais. Segundo informaron despois fontes da Consellería de Infraestruturas e Mobilidade, o Concello correrá a cargo da redacción do convenio, mentres que a Xunta facilitará toda a información dispoñible sobre as liñas de autobuses que desenvolven integramente os seus servizos polo municipio pontevedrés.
Os técnicos autonómicos mostráronse receptivos fronte á petición municipal de adaptar os servizos de transporte interurbano aos percorridos urbanos pola cidade. Mobilidade recordou que o conxunto de liñas atópase actualmente "en licitación", polo que, comprometeuse a que, unha vez sexa adxudicado o novo contrato, se perfilen os axustes das liñas coa empresa adxudicataria. Iso si, con advertencias previas. Os aumentos de servizos que impliquen tamén un incremento dos custos, "deberán ser asumidos polo Concello
NOVOS SERVIZOS. Na reunión avanzouse noutros aspectos que está previsto desenvolver en posteriores encontros. Por exemplo, o impulso de "Servizos de Interese Municipal", baixo a mesma fórmula de cofinanciación autonómica e local.
A próxima cita terá lugar en setembro e, se non hai cambios, o Concello prevé acudir coa súa proposta de reaxuste das liñas interurbanas ao seu paso pola cidade e o seu borrador de convenio. "Tratar de seguir traballando conxuntamente para que os pontevedreses conten co mellor transporte e que este tamén vertebre o concello de Pontevedra", engadiron responsables da Consellería.
A este respecto, fontes municipais coincidiron coas autonómicas ao sinalar que o principal acordo obtido na reunión foi o de traballar nun convenio para "coordinar as competencias de cada Administración sobre transporte público". Agora ben, no seu caso eludiron facer referencia ao sistema de financiamento.
Paralelamente, o Goberno local pretende promover un sistema de transporte público a demanda para conectar o centro co rural a través de taxis. A proposta foi acollida de forma positiva polo gremio dos autopatronos, pero aínda debe ser desenvolvida. Ademais, está en estudo a aplicación dunha tarifa plana para viaxar en taxi aos aeroportos próximos.
