A Xunta de Galicia e Cruz Vermella comezaron xa as accións de promoción do Camiño Portugués. Este sábado tivo lugar a presentación da que será a antesala dun percorrido vinculado este ano aos proxectos de inclusión e igualdade. A entidade benéfica ha realizado a primeira camiñada entre Pontevedra e San Amaro abrindo así o programa O Teu Xacobeo.
O delegado territorial da Xunta en Pontevedra, Luís López e a presidenta provincial de Cruz Vermella, Teresa Álvarez, participaron neste percorrido xunto a un total de 30 persoas, ao longo dun percorrido de dez quilómetros que tivo na Praza da Peregrina o seu lugar de orixe e a través da ponte do Burgo e os arredores de Alba, chegouse ata San Amaro. "A Xunta de Galicia está a facer un gran esforzo na promoción e posta en valor deste dobre Ano Santo que, ademais do seu valor espiritual e cultural, vai ser un importante púo para a reactivación económica e turística tan necesaria tras a pandemia e que ademais está concibido para achegalo moito aos galegos co obxectivo de que sintan o Xacobeo como algo propio", sinalou o representante autonómico, que revelou que este ano se van a desenvolver 220 eventos do programa O Teu Xacobeo por toda a comunidade, investindo un total de 3,3 millóns de euros por parte da Xunta.
Esta primeira camiñada, que coincide co Día Internacional das Familias e que estivo orientada a este colectivo, é a actividade estrela do proxecto de Cruz Vermella, financiado pola Xunta de Galicia.
Os seguintes eventos da ONG serán outras tres camiñadas o 20 de xuño no Día Mundial do Refuxiado, o 26 de xullo con motivo do Día dos Avós e o 12 de agosto, celebrando ademais o Día Internacional da Mocidade. Posteriormente, xa no mes de setembro, haberá un concurso de relatos e debuxos.
