O vicepresidente segundo e conselleiro de Economía, Empresa e Innovación, Francisco Conde, asegurou este martes na súa visita a Pontevedra que "non hai ningún tipo de emprazamento" que permita trasladar á fábrica de Ence de Lourizán a outra localización nesta comunidade polo que será "responsabilidade" de PSOE e BNG, afirmou, "explicar se prefiren que se vaia a Asturias".
Conde fixo estas declaracións durante a visita á mostra Os roteiros da forma, que organiza a Xunta a través da Fundación Artesanía de Galicia junto coa Fundación RAC (Rosón Arte Contemporáneo). Respondendo as preguntas dos xornalistas, o conselleiro mostrouse rotundo con respecto ao futuro da fábrica de celulosas, afirmando que se non pode continuar en Lourizán "a alternativa xa está decidida" e a compañía pasteira deslocalizará o seu investimento cara a Asturias.
Esta decisión "é inmediata" se o Goberno de España non "reflexiona", segundo o titular de Economía no Executivo galego, quen considera que é "unha irresponsabilidade" por parte de PSOE e BNG "non afrontar a realidade". A decisión que hai que tomar, dixo, é "se Ence pode continuar ou non o seu labor industrial en Galicia" –a empresa ratificou este mesmo martes que non ve alternativa "viable" para a recolocación na comunidade–.
Ver máis: O comité de empresa de Ence esixirá a Ribeira que convoque a mesa de diálogo
Segundo reiterou o vicepresidente económico da Xunta, socialistas e nacionalistas "deben decidir" se prefiren que esta actividade industrial e os postos de traballo que xeran "sexa en Galicia ou en Asturias".
Francisco Conde destacou "o gran impacto" sobre o emprego e o futuro de Galicia que tería o peche de Ence, "afectando non só aos traballadores da planta senón a todo o sector forestal e tamén ao ámbito loxístico".
A XUNTA, "COS TRABALLADORES". Na Xunta de Galicia, subliñou Conde, vaise estar "cos traballadores" ao entender que a actividade industrial de Ence na ría de Pontevedra "cumpre todos os parámetros" ambientais e urbanísticos. "Non hai ningún tipo de motivo para que non teña a oportunidade de manterse", esgrimiu.
Para Francisco Conde, a resolución deste conflito é "moi sinxela" e pasa porque o Goberno que preside Pedro Sánchez modifique o artigo 18 da futura Lei de Cambio Climático, para que esta normativa non limite a 75 anos a permanencia en terreos de dominio público marítimo terrestre a empresas xa asentadas.
Ver máis: O asalto á Alcaldía de traballadores de Ence acaba no xulgado
Finalmente, Francisco Conde mostrou a disposición da Xunta a formar parte dunha hipotética mesa de traballo para analizar o futuro de Ence na ría de Pontevedra.
OPCIÓNS COMO AS PONTES OU A PLISAN, DESCARTADAS POR ENCE. Ence tamén defendeu, mediante un comunicado, que "non existe ningunha localización alternativa viable desde un punto de vista técnico (proximidade a un porto, auga, madeira) nin económico (dada o inxente investimento, próxima a 700 millóns de euros, que requiriría construír unha nova planta en Galicia)" para construír unha nova fábrica de celulosa en Pontevedra nin en toda a comunidade galega e remítese a estudos "independentes, como o da enxeñería IDOM".
Segundo a empresa, As Pontes non podería aloxar a planta, por diferentes motivos. En primeiro lugar, o río Eume, debido ao seu caudal, non ten capacidade para absorber o efluente da fábrica. "Tampouco o lago das Pontes xa que, aínda que o volume de auga é elevado, a taxa de renovación deste lago artificial é moi reducida, o que podería dar lugar a graves problemas ambientais (redución de osíxeno) e afectar á calidade da auga do lago", engade.
Para a compañía, Plisan "tampouco é unha alternativa viable, ante a falta de dispoñibilidade de auga no río Miño, así como a inviabilidad de descargar efluentes no río, ademais do feito de ser un río binacional".
Finalmente, a compañía, que reitera a súa vontade de diálogo coas administracións e os traballadores, subliña que a localización de Barro-Meis "quedou descualificada ao avaliar a superficie real dispoñible". Ademais, o feito de que haxa industrias xa situadas alí "imposibilita agrupar unha parcela de 35 hectáreas, tamaño que se considera mínimo para situar unha planta de celulosa do tamaño da biofábrica de Pontevedra".
