A Xunta instalará este mércores a nova iluminación provisional na ponte da Barca. Así o confirmaron o luns responsables da Consellería de Infraestruturas, que explicaron que os puntos de luz colocaranse no tramo dereito (dirección Poio-Pontevedra) que agora permanece cortado ao paso de peóns polo desmonte da vella marquesiña de madeira.
A reposición deste material prodúcese despois do roubo das lámpadas do pasado sábado, que deixou o viaduto case ás escuras. Só quedaron en pé dúas delas e moitos usuarios víronse obrigados a utilizar os seus móbiles como lanternas para poder cruzar con certa seguridade a zona.
Ao longo da mañá do luns, as luminarias que non foron subtraídas a pasada fin de semana non se atopaban xa no viaduto. Os operarios da concesionaria, que denunciou o roubo do sábado ante a Policía, continúan coa reforma da ponte.
