A Xunta investirá 3,7 millóns de euros na reforma integral da residencia de maiores de Pontevedra, segundo anunciou este venres a conselleira de Política Social, Fabiola García. Durante unha visita ao centro, situado en Campolongo, explicou que esta actuación será a "maior partida en materia social" que recollen os orzamentos da Xunta para 2020.
Este centro, no que residen 130 persoas maiores, é "emblemático" na rede pública da Xunta, pero a titular de Política Social recoñeceu ser "consciente" de que actualmente presenta "carencias e necesidades" que hai que atender. Entre outras actuacións, explicou que se realizará un "cambio completo" das fiestras para mellorar o illamento, crearase unha enfermería "mellorada e ampliada", incrementarase o número de vestiarios femininos, cambiaranse os ascensores e reformarase a terraza da segunda planta. A reforma incluirá ademais a renovación dos cuartos e dos espazos comúns nos que, a diario, conviven os usuarios da residencia.
Segundo García, esta actuación está "pactada, falada e acordada" cos traballadores da residencia, co obxectivo de seguir "mellorando" a calidade asistencial e "perfeccionar" o servizo que presta aos usuarios e as condicións de traballo. As obras serán compatibles co mantemento da actividade asistencial, xa que se tomarán as "medidas necesarias" para que "non se interrompa" o normal funcionamento do centro.
A conselleira de Política Social avanzou que os orzamentos da Xunta para 2020 incluirán tamén unha partida de 1,3 millóns para a reforma integral do centro de menores Avelino Montero, situado tamén na cidade de Pontevedra.
Ademais, recordou que "da man" da Fundación Amancio Ortega, no primeiro semestre de 2020 comezarán as obras de construción da nova residencia de maiores da Parda que, segundo sinalou, será unha "referencia" a nivel europeo que dará servizo a unhas 120 persoas e creará uns 115 postos de traballo. Segundo García, ese centro contará "co mellor equipamento" e cunha unidade psicoxeriátrica especializada no tratamento de demencias como o alzhéimer.
