A Xunta publicou este luns na Plataforma de Contratos de Galicia a licitación da elaboración do proxecto e a execución das obras do novo emisario submarino da estación depuradora de augas residuais dos Praceres cun orzamento superior a doce millóns de euros, cofinanaciados pola Unión Europea a través dos fondos Feder.
Recentemente, o Consello da Xunta autorizou o gasto para avanzar nesta obra hidráulica declarada de interese para a comunidade autónoma. Todas as empresas interesadas en levar a cabo este contrato, que conta cun prazo de execución de 18 meses, poderán presentar as súas ofertas ata o próximo 14 de outubro.
O proxecto modifica a localización da cámara de carga e da estación de bombeo co obxectivo de reducir o seu impacto visual, deixando libre a fachada litoral. Por outra banda, tamén se incrementa a lonxitude do tramo inicial no túnel do emisario para non afectar os bancos marisqueiros do montón nos Praceres, sen que esta medida implique un incremento do volume de escavación.
DÚAS PARTES. A actuación divídese en dúas partes. Por unha banda, a obra terrestre, que se corresponde coa execución da cámara de carga e a estación de bombeo ao emisario, e, por outra o emisario submarino. Os traballos proxectados darán servizo a unha poboación aproximada de 141.204 habitantes para o horizonte do ano 2042.
Trátase de acometer un novo emisario submarino que separe as verteduras industriais e os residuais e que conte coas dimensións adecuadas ás necesidades actuais e futuras. Tal e como destaca o ente autonómico, este proxecto incorporou varias modificacións co obxectivo de dar solución ás cuestións expostas durante o proceso de información pública, e que supuxo un aumento de dous millóns de euros do orzamento.
