A Xunta acaba de iniciar o reasfaltado dun tramo da estrada vella de Marín, a denominada PO-546. A obra conta cun orzamento próximo aos 46.000 euros e afecta a 160 metros deste viario que une Pontevedra co concello morracense.
O delegado da Xunta en Pontevedra, José Manuel Cores Tourís, comprobou este xoves o inicio da actuación de reforzo do firme. Fíxoo en compañía do xefe territorial de Infraestruturas e Mobilidade, José Luis Díez, e do director da obra, Alfonso Tenorio.
O Goberno galego informou este xoves a través dun comunicado de prensa de que o obxectivo dos traballos é a rehabilitación estrutural da estrada, que se atopa "moi afectada polo tránsito de vehículos". O mal estado deste viario provocou numerosas queixas nos últimos anos, tanto por parte de veciños como de usuarios. Especialmente belixerantes mostráronse colectivos ciclistas como Pedaladas, que advertiron dos perigos de transitar pola estrada vella de Marín.
Aquelas protestas derivaron nunha mellora parcial por parte da Xunta na zona a través da instalación de sinais de tráfico que recordan aos condutores a obrigación de gardar a distancia mínima de 1,5 metros coas persoas que circulan pola PO-546 en bicicleta.
Os traballos no lugar levan o corte do tráfico rodado nun dos carrís, o ao lado esquerdo, onde se están levando a cabo as tarefas de fresado para o posterior pavimentado. "Pedimos comprensión ós condutores, aínda que somos conscientes dos inconvenientes que ten sempre o corte dun carril, por iso intentaranse axilizar o máximo posible as obras, que teñen un prazo de execución dun mes pero que estarán rematadas, se o tempo o permite, en preto de dúas semanas", afirmou Cores Tourís.
A obra tamén incluirá a reposición de cinco tapas de servizos.
