O xurado do concurso de escaparatismo organizado pola Concellería de Promoción Económica, O Meu Compromiso, realizou este luns un percorrido polos 42 establecementos da cidade que participan no certame para valorar a creatividade dos seus escaparates.
O xurado está conformado polo deputado provincial Santos Héctor Rodríguez, o técnico do Servizo Municipal de Promoción Económica Francisco López Sieiro, e o xeneral manager da asina Sra. Nona Brand, Noemi de Miguel.
O obxectivo do certame é "concienciar sobre a importancia dunha decoración sostible, dinamizar e dar visibilidade ao comercio de proximidade, enxalzar a creatividade das nosas tendas e incentivar as compras nas tendas implicadas".
O xurado "valorará esencialmente a creatividade e a orixinalidade, así como o respecto pola esencia da campaña e a inclusión dos materiais que lles toquen nas súas zonas".
Este martes coñeceranse os nomes dos premiados, aos que se fará entrega de premios de 600 euros.
A edil de Promoción Económica, Yoya Blanco, acompañou aos membros do xurado durante un tramo da ruta para comprobar en persoa "a enorme calidade, bo gusto e compromiso co medio ambiente dos decorados instalados nos comercios participantes".
"Hai que agradecerlle especialmente á experta Cany Juncal, especialista en Visual Merchandising, que durante as pasadas semanas realizou asesoramentos entre os locais inscritos para enfocar os seus proxectos decorativos, este excelente resultado", destacou a edil socialista.