O Consorcio da Zona Franca de Vigo e o Concello de Pontevedra asinaron este martes o convenio de colaboración que permitirá ao Consorcio pór en marcha o Plan Estratéxico da capital e a súa área, que o delegado comprometera o pasado mes de marzo nunha visita á cidade e que busca crear emprego.
“O plan incluirá un diagnóstico territorial, obxectivos estratéxicos e unha folla de ruta con actuacións específicas, claras e realistas para a mellora da competitividade económica, a calidade de vida e para crear emprego”, dixo o delegado de Zona Franca, David Regades, tras asinar o acordo coa concelleira de Promoción Económica, Turismo, Emprego e Universidade do Concello de Pontevedra, Yoya Branco.
Segundo explicou Regades, “o proceso será participativo e organizaranse xornadas para recompilar opinións de axentes e entidades público-privadas relevantes sobre a situación actual e os retos futuros de Pontevedra, co obxectivo de enriquecer a proposta de accións para o futuro”.
Tal e como explica Zona Franca nun comunicado, o plan estratéxico comezará cun diagnóstico, fase na que se realizará a recompilación de información e datos que levarán a unha análise da situación socioeconómica da comarca.
A información sintetizarase para determinar debilidades, ameazas, fortalezas e oportunidades e a partir de aí redactarase un informe final
O traballo terá en conta a repercusión social e económica da crise do covid-19 e analizará a economía e o tecido empresarial desde parámetros como a tecnoloxía, a innovación e internacionalización, a contorna política e legal, a sociedade e a cultura, a demografía, o medio ambiente e a sustentabilidade.
A información sintetizarase para determinar debilidades, ameazas, fortalezas e oportunidades e a partir de aí redactarase un informe final.
Ademais, realizarase unha selección de proxectos ou casos de éxito con obxectivos similares, tanto de España como internacionais, que poidan resultar inspiradores e que se poidan aplicar á situación de Pontevedra.
Finalmente elaborarase unha lista de axudas públicas para financiar a implementación dos programas e actuacións propostas e formularanse unha batería de indicadores que faciliten a avaliación e seguimento periódico das accións que permitan a toma de decisións.
O protocolo ten unha duración de catro anos
“Coñecernos mellor é dispor de ferramentas para un futuro con esperanza. Queremos unha Pontevedra con capacidade de traballo, con postos de traballo e ideas para avanzar, para poder afrontar o futuro con optimismo”, dixo o tenente de alcalde de Pontevedra, Tino Fernández.
De face á consecución dos obxectivos, constituirase un grupo de traballo paritario con tres representantes de cada parte. O protocolo ten unha duración de catro anos.
