O 30 por cento dos menores de entre 8 e 12 anos que acceden por primeira vez á pornografía recoñecen que ese contido é a única fonte de información sobre a sexualidade, segundo alerta a Fundación de Axuda contra a Drogadicción (FAD).
Os datos, cos que a entidade pretende na súa última campaña concienciar sobre o consumo de pornografía nos menores, indican que case 7 de cada 10 adolescentes españois de entre 13 e 17 anos consome pornografía de xeito frecuente.
Nun comunicado a FAD sinala que o tipo de contido ao que os menores adoitan acceder son escenas "agresivas" ou "violentas"; nun 94% esa violencia é contra as mulleres e nunha porcentaxe similar esas imaxes dan a entender que ás protagonistas gústalles ser tratadas así.
Outro dato revelador do informe da FAD é que nove de cada dez pais ignoran que os seus fillos consomen pornografía online. Só un terzo dos proxenitores admite que supervisa de forma habitual a actividade en internet dos seus fillos e deles o 11 por cento toma medidas respecto diso.
"O perigo non é tanto que vexan pornografía senón que a súa sexualidade, que se está formando nesas idades, asuma como normais comportamentos agresivos, violentos", explica na nota de prensa a directora xeral de FAD, Beatriz Martín.
Martín destaca a necesidade de incorporar "" de forma "máis decidida" a educación afectivo sexual na familia ou no círculo escolar, pois os menores, alerta, "estáselles deixando a mercé de Pornhub".
A fundación advirte de que o consumo de pornografía afecta o desenvolvemento sexual adolescente e impacta na súa forma de entender a sexualidade e nas súas relacións, e pode desembocar en comportamentos de risco.
Por iso, a campaña Por no, porno que a FAD activou ata xaneiro de 2022 pretende denunciar a falta de comunicación entre pais e fillos sobre a sexualidade e promover unha mellor educación sexual.
