Amancio Ortega é o máis rico de España e a súa filla Sandra, a cuarta

Rafael del Pino, de Ferrovial, e Juan Roig, de Mercadona, completan o podio de millonarios españois, segundo a revista Forbes
El fundador de Inditex, Amancio Ortega.
photo_camera El fundador de Inditex, Amancio Ortega.

O fundador de Inditex, Amancio Ortega, repite como a persoa máis rica de España cunha fortuna de 60.900 millóns de euros, unha cantidade que resultad dun incremento de 14.900 millóns con respecto a un ano antes e que equivale á suma dos 17 seguintes membros da lista Forbes en España.

No segundo posto da clasificación sitúase o presidente de Ferrovial, Rafael del Pino, e a súa familia cunha fortuna de 8.600 millóns, mentres que o presidente de Mercadona, Juan Roig, figura no terceiro lugar da lista con 7.500 millóns. Os mesmos postos que tiñan na edición anterior.

A lista Forbes dos máis ricos de España cifra os 100 grandes patrimonios do país en 189.250 millóns de euros, o 15 % máis ou, o que é o mesmo, 24.826 millóns máis que un ano antes.

En cuarto lugar sitúase a filla de Amancio Ortega e a falecida Rosalía Mera, Sandra Ortega, tamén con 7.500 millóns, seguida polo dono de Mango, Isak Andic, con 4.500 millóns; a presidenta de Coca-Cola Iberian Partners Sol Daurella e familia, con 3.700 millóns e os accionistas do grupo de compoñentes de automoción Gestamp, Francisco e Jon Ribeiras Mera, con 3.200 millóns.

No posto oitavo figuran os accionistas de Mahou San Miguel, as familias Herráiz Mahou e Gervás, con 2.800 millóns, seguidos do presidente de OHL e Grupo Villar Mir, Juan Miguel Villar Mir, con 2,700 millóns. O top ten complétao o dono de Desigual, Thomas Andreas Meyer, con 2.500 millóns.

Numerosos coñecidos do panorama empresarial español aparecen a continuación, como Víctor Grifols e familia (Grifols) no posto 11 ; a familia Entrecanales (Acciona), no 12; os donos do grupo Masaveu e Veguín, no 13; Juan e Carlos March (Banca March) no 14 ou Dimas Gimeno e as fillas de Isidoro Álvarez (El Corte Inglés) no 15.

Figuran tamén os accionistas de Almirall, Antonio e Jorge Gallardo, no 16; Manuel Jove (Inveravante) no 17; Ana Patricia Botín (Santander) no 21; Juan Abelló no 22, Demetrio Carceller (Damm) no 23; Gabriel Escarrer (Meliá) no 24; Helena Revoredo (Prosegur), no 25; Alicia Koplowitz no 27 e a súa irmá Esther no 95; Jaime Botín no 29; a familia Lara no 33; Florentino Pérez no 34; a baronesa Thyssen no 45 ou o cantante Julio Iglesias no 46.

Nesta edición, a lista inclúe a 11 mulleres, tres menos que en 2014, 68 homes e 21 familias. A idade media dos ricos baixou a 61,6 anos, fronte a 67 o ano pasado.

En canto á orixe desas fortunas, o sector téxtil segue sendo o máis preponderante, con 76.950 millóns, seguido do inmobiliario, as finanzas, a bolsa ou a alimentación.

Por rexións, aínda que tanto Cataluña como a Comunidade de Madrid acollen cada unha a 26 membros da lista, é a segunda a que concentra máis capital, con 40.125 millóns de euros, fronte a 32.725 millóns en territorio catalán.

Aínda que con menos ricos na lista, só 8, Galicia é a comunidade que concentra a maior fortuna, con 73.725 millóns de euros, ao incluír a Amancio Ortega no seu cómputo. Para a elaboración da lista, Forbes manexou datos do Rexistro Mercantil e a Comisión Nacional do Mercado de Valores (CNMV).

comentarios