Bertín Osborne fixou a súa residencia en Luxemburgo e cedeu os seus dereitos de contratación a unha sociedade panameña co obxectivo de pagar menos impostos a Facenda, segundo unha información que publica o diario El Confidencial.
O cantante e presentador de televisión contaría coa colaboración de Joaquín Arespacochaga, experto na creación de armazóns offshore e presunto cerebro da trama do PSOE que desviou 14 millóns de euros para reindustrializar Cádiz.
"Ese foi o maior erro da miña vida, fai máis de 20 anos: fiarme dun asesor fiscal mentres eu vivía en Estados Unidos. Xa paguei por aquel erro máis de cinco millóns de euros e foi xulgado por iso. Espero non ter que pasar por un segundo xuízo 20 anos despois", recoñece o propio Osborne a El Confidencial.
Os datos sobre a presunta elusión fiscal de Bertín Osborne serían localizados pola Policía no ano 2013 no despacho do mencionado asesor. Agora están en posesión da Audiencia Nacional para que os inclúa no procedemento sobre a rede Charisma, unha trama que evadiu diñeiro de medio milleiro de fortunas españolas.
LUXEMBURGO. Facenda empezou a reclamar a Osborne diñeiro correspondente a declaracións da renda dos primeiros anos do século XXI. Segundo a información de El Confidencial, estes documentos recollen tamén que o artista adquiriu todas as accións dunha sociedade panameña por 250.000 dólares, cedendo a esta sociedade os seus dereitos cando Facenda comezou a embargarlle. Ademais, esta cesión fíxose en calidade de residente en Luxemburgo, onde mantivo un aloxamento como residencia oficial entre 1998 e 2002.
