A calor chegou para quedar e esta semana os termómetros dispararanse en case toda a Península pola chegada dunha masa de aire cálido procedente de África que provocará un episodio de calor "moi inusual" para mediados do mes de maio, con temperaturas entre 10 e 15 graos por encima do normal nesta época, segundo o portavoz da Aemet, Rubén do Campo.
Nalgúns lugares o mercurio subirá ata os 40 graos nos próximos días, mentres que en Galicia roldarán os 35 graos durante o fin de semana en puntos do interior de Lugo como Monforte de Lemos ou Quiroga, tónica que se seguirá tamén en Ourense que alcanzará os 36 graos o sábado.
Con todo, A Mariña lucense e o Ortegal serán unha especie de oasis esta semana e segundo as predicións as temperaturas na costa non superarán os 20 graos, algo excepcional pois suporá 10 graos menos que os que se esperan nalgunhas comunidades españolas como Castela e León con 33 graos, Madrid con 38 e algunhas provincias andaluzas con 41 segundo a predición da Axencia Estatal de Meteoroloxía (Aemet). Esta situación débese á aproximación dun sistema frontal atlántico a Galicia, con choivas que serán máis intensas na metade oeste sobre todo hoxe.
RÉCORD EN DOUS DÉCADAS. No entanto, o episodio cálido que se espera a nivel xeneralizado na Península é tan "inusual" que podería chegar a ser, se se confirman os prognósticos, o máis importante dos últimos vinte anos na Península e en Baleares en canto a temperaturas medias, tanto das máximas como das mínimas.
Ademais das máximas, que estarán entre 10 e 15 graos por encima do normal para mediados de maio, as mínimas estarán tamén entre 5 e 10 graos por encima do que é normal nesta época, polo que en moitos lugares sucederanse o que se coñece como "noites tropicais" -cando os termómetros non baixan de 20 graos-.
Rubén do Campo precisa que ese repunte das temperaturas será especialmente significativo a partir de mañá e prolongarase ata o domingo 22, e durante eses días superaranse os 34 ou 35 graos nas horas centrais do día en amplas zonas do centro e o sur da Península, e tamén no Val do Ebro.
"É posible que falemos xa dos primeiros 40 graos de temperatura máxima deste ano en puntos dos Vales do Tajo, do Guadiana e do Guadalquivir, sobre todo a partir do venres", dixo o portavoz da Aemet, e sinalou que poderían alcanzarse estas temperaturas en cidades como Badaxoz, Sevilla ou Córdoba.
As predicións de Aemet apuntan que de face ao luns 23 e sobre todo o martes as temperaturas volvan baixar e sitúense xa en valores xa máis propios para estas datas.
Do Campo advertiu de que con estas altas temperaturas o risco de incendios é bastante alto e recordou que a estas alturas do ano o índice de raios ultravioleta está xa moi elevado, polo que aconsellou "extremar as precaucións xa que a calor extrema pode causar problemas de saúde".
