A actriz Clara Lago: "Xa teño superado o loito pola perda do anonimato"

Clara Lago, que aos seus 24 anos xa rodou dezaoito longametraxes, entre elas a cinta máis taquillera da historia do cine español, Ocho apellidos vascos, asegura que empezar no cine sendo unha nena permitiulle levar "o loito pola perda do eu anónimo" de xeito máis paulatino.

"Obviamente, a miña vida cambiou desde Ocho apellidos vascos porque o meu nivel de popularidade aumentou bastante, pero tamén é verdade que, como eu empecei tan nova e tiven picos de popularidade pola tele, por Compañeros ou Los hombres de Paco, dentro de todo, para min non foi un choque tan grande", afirma nunha entrevista con Efe.

A madrileña promociona este martes a estrea da súa nova película, Extinction, do cineasta Miguel Ángel Vivas, onde interpreta a unha moza embarazada que salva milagrosamente a vida nun mundo postapocalíptico e despoboado, ameazado por seres moi parecidos aos zombies, xunto ao estadounidense Matthew Fox.

Ri a actriz ao recordar que tamén ela, como a novísima protagonista de Extinction, Quinn McColgan, foi unha nena actriz da man de Imanol Uribe, que lle deu o seu primeiro papel protagonista con apenas 12 anos en El viaje de Carol.

"Quinn é destes nenos flipantes que ten un nivel de madurez moi alto pero sen deixar de ser unha nena, non é un repolo, vamos, é unha marabilla", afirma a actriz mentres axita as súas expresivas mans para intentar explicar entre risas que ela nunca foi "repelente".

Por iso, engade, "esa especie de loito que creo que sofre a xente que, de súpeto, pasa de ser unha persoa normal a un nivel de fama moi alto, cando che arrincan unha parte de ti e se produce a perda dese eu anónimo, eu non sei se por sorte ou por desgraza funo vivindo moi paulatinamente, fun crecendo dese xeito".

"Para min non foi un choque tan grande, pero é verdade que houbo un momento, moi ao principio, que si tiven un choque grande, cos 'paparazzi', porque era un mundo que eu non vivira e era unha situación moi rara, moi violenta e que me custou e me custa entender, pero logo tranquilizouse e, a verdade, lévoo ben", confesa a Efe.

Esta fama desmesurada que veu tras Ocho apellidos vascos atacou a todo o equipo da película, aínda que máis á parella protagonista, que, ademais, terminou a rodaxe como parella real e sendo Dani Rovira un debutante no cine.

"A min isto non me cambiou ata o punto de dicir: a miña vida é outra", asegura Lago, que, do mesmo xeito que Rovira, Carmen Machi e Karra Elejalde repetirán na segunda parte da cinta, que ocorrerá en Cataluña; eses Ocho apellidos catalanes que chegará ás salas en novembro.

E engade entre bromas que tamén é posible que leve mellor a situación que outros porque o feito de que ela interpretaba á "vasca borde"; iso fai que a xente se lle achegue "doutro xeito", dito o cal anima o seu compañeiro Matthew Fox a contar a súa propia experiencia coa fama, no seu caso, mundial tras interpretar ao Jack Shepard de Perdidos.