Ecoloxistas piden a José Blanco que pare as obras no Canón do Sil

Os membros da fundación ecoloxista 'Germán Estévez' pediron a José Blanco, ministro de Fomento, que paralice as obras que a empresa hidroeléctrica Iberdrola efectúa no Canón do Sil. O colectivo estima que "Blanco é a única persoa que pode deter os atentados ecolóxicos que comete Iberdrola no Sil, porque pode interceder ante Medio Ambiente para evitar que a firma continúe co seu programa quincenal de baleirado do río para retirar os cascallos".

Os ecoloxistas recalcaron que "José Blanco non pode permitir, nin como ministro nin como galego, que Iberdrola dane de tal xeito unha das zonas de España que alberga maior cantidade de cenobios, igrexas, patrimonio natural e ambiental, dado que o único obxectivo da empresa, con estas obras, é gañar diñeiro sen importarlle para nada destruír unha riqueza que é patrimonio de todos os cidadáns".

'Germán Estévez' engadiu que o ministro de Fomento debe recordar que cando se proxectou o AVE entre Lubián e Ourense, á altura de Vilar de Barrio, concretamente en Parada e na zona de Val de Arnoia, "o director tivo en conta as alegacións presentadas pola nosa entidade ecoloxista o que propiciou respectar unha contorna de castiñeiros, cunha extensión de 62 hectáreas, que contaban con máis de 300 anos de idade".

O colectivo estima que Blanco debe ter en conta, de igual xeito, a Ribeira Sacra, sobre todo ao existir a aspiración de que chegue a ser Patrimonio da Humanidade ou, cando menos, referente do turismo internacional. Os ecoloxistas agregaron que a importancia desa zona, onde Iberdrola realiza as obras de ampliación dunha presa, xa é un referente mundial.