Mourinho acode ao funeral polo seu pai

O proxenitor do adestrador do Manchester United faleceu o domingo tras unha longa enfermidade ► Karanka e Rui Faria, entre os asistentes ao velorio
José Mourinho
photo_camera José Mourinho

O adestrador do Manchester United, José Mourinho, asistiu este martes ao funeral do seu pai –falecido o pasado domingo tras unha longa enfermidade–, que tivo lugar na cidade portuguesa de Setúbal ao que acudiron centenares de persoas.

O funeral de Jose Manuel Mourinho Félix, que tamén foi xogador e adestrador de fútbol, celebrouse na capela do Socorro de Setúbal, a uns 50 quilómetros ao sur de Lisboa, segundo informou o diario luso Jornal de Notícias.

José Mourinho axudou a levar ata a igrexa o cadaleito do seu pai, que foi cuberto coas bandeiras dos dous equipos que representou como porteiro e como adestrador, o Belenenses e o Vitória de Setúbal. Tras o funeral, Mourinho Félix foi enterrado no cemiterio de Nossa Senhora da Piedade de Setúbal.

O pai de José Mourinho morreu o pasado domingo aos 79 anos tras unha enfermidade prolongada. No velorio do luns e o funeral marcaron presenza diferentes figuras do mundo do fútbol, como o presidente do Benfica, Luís Filipe Vieira, ou o exinternacional portugués Fernando Tomé.

Tamén acudiron actuais e antigos membros do equipo técnico de José Mourinho, como Aitor Karanka, Silvino Louro, Baltemar Brito, Ricardo Formosinho, Rui Faria e José Morais.

Comentarios