Os nenos e nenas en España teñen xa idea da quen lles gustaría ter como xefes cando sexan maiores: ao futbolista do F.C. Barcelona Leo Messi e á cantante estadounidense Katy Perry, pero tamén ao director do Centro de Coordinación de Alertas e Urxencias Sanitarias (CCAES), Fernando Simón.
Así o reflicte a enquisa anual Que queres ser de maior de Adecco, que analiza en que queren traballar os nenos e nenas en España cando sexan adultos e tamén as súas percepcións sobre o mundo laboral.
Cun total de 1.800 menores enquisados, os datos reflicten que Messi sería o xefe favorito para os mozos (16,5 %), que nun 11,7 % opta por non ter superiores, seguido en terceiro lugar dun 9,9% que escolle a Fernando Simón, opción pola que se inclina o 8,3 % das mozas, sendo esta a segunda resposta máis numerosa, só por detrás da cantante Katy Perry (10,2 %).
O epidemiólogo non aparecera ata este ano en ningunha das enquisas, na que Rosalía é o terceiro nome máis repetido polas mozas (8,2%).
Os nenos e nenas en España soñan con ser médicos (22,1%, eles e 22,2%, elas) e continúan nos postos principais a profesión de futbolista (24,5% dos mozos), a de profesora (20,4 % das mozas), a de enfermeira (6,8% das mozas) ou a de youtuber (6,3% dos mozos).
Por primeira vez, o xornalismo aparece entre as profesións máis comentadas polos mozos, cun 2,9% que querería dedicarse a iso.
Á pregunta de que debería facer o Goberno para non volver á situación que viviu o país en marzo pola pandemia do coronavirus, a medida máis repetida é realizar máis probas de detección (18,7 %), seguida de apostar polo uso de máscaras (16,1 %), de mellorar as condicións laborais dos sanitarios e confiar nos expertos (10,5 %), entre as solucións máis nomeadas.
De feito, os médicos son os profesionais máis valorados durante a pandemia polos mozos (49,7%), seguidos das forzas de seguridade do Estado (12,9%), dos traballadores no sector alimentario/distribución (9%) e dos profesores (6%).
As mozas tamén sitúan aos médicos como os máis valorados (51% dos votos), seguidos de profesores (17%) e os traballadores do sector alimentario/distribución (8%).
Seis de cada dez enquisados aseguran estar moi contentos por que os seus pais estivesen, durante o estado de alarma, sempre en casa, pero un 49,7 % di que foron as súas nais as que máis lles axudaron coas súas tarefas, o 18,2 % que os seus pais e o 32,1 % asegura que ambos por igual.
O 52,3% dos nenos e nenas prefire volver ao colexio antes que quedar en casa o curso que vén, mentres que o 12 % móstrase indeciso.
