Novas gravacións de Diana de Gales revelan que sufriu bulimia

A princesa recoñecía nos audios que a ansiedade empezou meses antes da voda con Carlos de Inglaterra
Diana de Gales
photo_camera Diana de Gales

Diana de Gales sufriu bulimia e ansiedade pola tensión que lle provocaba a súa relación con Carlos de Inglaterra, segundo a transcrición dunhas gravacións feitas pola princesa en 1991 que revelou este sábado o tabloide británico The Daily Mail.

A súa batalla coa bulimia comezou días antes da proposición formal de matrimonio do príncipe de Gales, en febreiro de 1981, cando ela tiña 19 anos. "Recordo a primeira vez que me provoquei ese mal. Estaba emocionada porque pensaba que era un modo de aliviar a tensión", relata Diana nunha das cintas que gravou cando o seu matrimonio co herdeiro ao trono británico xa se estaba desintegrando.

A princesa describe como sentiu "encollida ata a nada" nos meses previos á súa voda, en xullo de 1981. "A bulimia comezou unha semana antes do compromiso. O meu marido púxome unha man na cintura e dixo: 'Un pouco gordiña por aquí verdade?'. Iso disparou algo en min", relata Diana.

"A primeira vez que me mediron para o vestido nupcial, tiña 73 centímetros de cintura. O día que casei, medía 60 centímetros", indica a princesa nesas gravacións.

O príncipe Enrique, fillo menor de Diana, revelou este ano que necesitou acudir a terapia para afrontar a morte da súa nai nun accidente de circulación en París en 1997, mentres que Guillermo, o seu irmán maior, admitiu que lle custou "case 20 anos" falar sobre Diana "de forma máis honesta".

Comentarios