AO LONGO dos anos, o sector do xogo foi evolucionando, adaptándose ás novas tecnoloxías e ás demandas do público. Con todo, nos últimos tempos este sector presenta certo declive do lecer físico e presencial fronte ao virtual. A chegada de novas xeracións como a dos nativos dixitais ou os millenials cambiárono todo. Internet converteuse nunha nova canle máis atractivo para eles pola súa accesibilidade (365 días/24 horas), o anonimato ou a inmediatez, entre moitas outras razóns. Xa non é necesario acudir en persoa a un casino ou a unha sala de bingo, onde hai un maior control, senón que todo se pode facer desde o salón de casa. Ademais, o asentamento dos dispositivos móbiles deixou en segundo plano ao xogador tradicional.
Así, mentres que nos anos máis duros da crise o xogo presencial perdeu fol e rexistrou grandes baixadas nas cantidades de diñeiro xogado (aínda que agora empeza a recuperarse), desde a súa regulación, en xuño de 2012, o online non fixo máis que aumentar. Segundo datos da Dirección Xeral de Ordenación do Xogo, dos 2.726 millóns que se xogaron ese ano aumentou ata 10.885,9 en 2016 e tan só no primeiro trimestre de 2017 as cantidades xogadas xa estiveron moi preto dos 3.000 millóns.
Un 7,3% dos estudantes de ESO do concello de Pontevedra apostou en xogos online no último ano
O que se oculta detrás destes datos é unha enfermidade da que cada vez se fala máis, a ludopatía. As novas tecnoloxías volveron aínda máis popular unha adicción que hai pouco máis de 20 anos que se trata, provocando que cada vez máis xente nova acuda a grupos de autoaxuda para superala. De feito, segundo un recente estudo realizado na Universidade de Santiago, o 6,5% dos adolescentes galegos entre 15 e 17 anos -ao redor de 5.000 menores- aposta a través de páxinas de azar. O equipo investigador, liderado polo profesor da Facultade de Psicoloxía Antonio Rial Boubeta, concluíu ademais que o 10% bota man da paga ou do diñeiro dos seus pais para gastar en páxinas web de azar. En Pontevedra, o dato é máis alarmante pois, segundo un estudo realizado este ano polo Concello entre 2.937 estudantes de ESO, o 7,3% aseguraba apostar en xogos online no último ano.
Así mesmo, a Sociedade Española de Patoloxía Dual (SEPD) alertaba o pasado ano dun aumento dos casos de mozos e adolescentes adictos ao xogo online de forma patolóxica, unha problemática que adoita levar asociados trastornos mentais como a fobia social, o trastorno obsesivo compulsivo ou o déficit de atención. Así, aseguran que coas súas características intrínsecas, o xogo por Internet ten máis probabilidades de resultar altamente adictivo que o xogo presencial.
De todos os xeitos, como afirma Germán Verme, director da Fundación Codere, "non existe unha clara distinción entre xogadores problemáticos presenciais e os específicos online, aínda que si diminuíu tanto a idade de inicio, como algúns parámetros tradicionais do posible trastorno".
O auxe do xogo online tamén se pode ver nas persoas que posúe unha conta nas páxinas dedicadas ao mesmo. Así, nos tres primeiros meses de 2017, rexistráronse 593.052 usuarios novos, un aumento do 2% respecto ao mesmo período do ano anterior. De feito, 985.333 persoas admitían xogar polo menos unha vez en 2015, preto dun 20% máis que en 2014. En canto ao perfil de xogadores, case oito de cada dez son homes e a idade máis representativa está entre 26 e 35 anos, cun 37% do total.
Por tipos de xogo, o que máis triunfa a través de Internet son as apostas. Así, de todo o diñeiro xogado no primeiro trimestre de 2017, estas acapararon o 46,33%, seguidas do casino (cerca do 40%) e, moito máis lonxe, o póker (co 13,52%), e o bingo (0,57%). Anecdótica é a franxa de mercado que abarcan os concursos, que non chegan nin a unha décima do total (0,04%). Mentres que as cantidades xogadas en casas de apostas online e casino aumentaron con respecto ao primeiro trimestre de 2016 (un 3,96 e un 31,3%, respectivamente), no bingo reducíronse ao redor dun 10%, no póker un 1,79% e, no caso dos concursos, esa baixada sitúase no 33,78%.
PUBLICIDADE. A publicidade é un factor fundamental nas estratexias dos operadores de xogo online. Iso implica que, á vez que aumenta o auxe desta canle, tamén o faga o investimento publicitario. Así, mentres que o gasto en publicidade situouse en 22,36 millóns de euros no primeiro trimestre de 2015, esta cifra aumentou ata 28,02 nos mesmos meses de 2017, o que supón unha subida do 20 por cento.
O que máis triunfa a través de Internet son as apostas, que acaparan o 46,33% do diñeiro xogado no primeiro trimestre de 2017
A Lei de regulación do xogo aprobada en xuño de 2012, que legaliza o xogo online logo de anos nas pavías, anunciaba que regularía a publicidade mediante un real decreto. Con todo, case cinco anos despois, segue no aire. O único que ten como límite é a protección de consumidores e usuarios dos xogos de azar e a dos menores. Con todo, non hai, entre outras cousas, limitación publicitaria ás mensaxes en horario infantil e partidos políticos como o PSOE piden aplicar á publicidade de xogos e apostas a mesma restrición que a alcol e tabaco.
Doutra banda, a promoción do xogo a través de Internet non só baséase na publicidade tradicional, senón que fan uso de bonos ou outros obsequios, sen depósitos previos ou multiplicando o diñeiro empregado, contribuíndo desta forma a fomentar o xogo. Así, no primeiro trimestre de 2017, os operadores de xogo en liña gastaron 16,99 millóns de euros en bonos, aumentando un 33,25% nos últimos dous anos.
PRESENCIAL. Pese ao auxe do xogo en liña, o presencial non queda atrás. Aínda que se resentiu durante os anos máis duros da crise, en 2015 volvía a cifras de 2001, pois, segundo datos do Anuario do Xogo en España elaborado pola Fundación Codere, os españois gastáronse preto de 25 millóns e medio en loterías da Sociedade Estatal Loterías e Apostas do Estado (Selae) e a Once, casinos, bingos, máquinas, apostas deportivas en hipódromos e sorteos e loterías rexionais, mentres que nese ano o online moveu pouco máis de oito millóns e medio.
Mentres que a Lotería de Nadal e o Sorteo do Neno mantivéronse case a salvo dos vaivéns do mercado, as apostas deportivas privadas están en crecemento e os salóns de xogo mostras signos de revitalización grazas á renovación dos seus modelos de negocio. Na outra cara da moeda, tanto a Quiniela como outras apostas de Selae e os produtos da Once están en declive, a pesar da recuperación conxuntural, e as apostas hípicas atópanse xa máis aló do declive.
En canto ao emprego que xera, en 2015 o sector privado daba traballo directo a 42.476 persoas, tras 1.300 novas contratacións ao longo do ano polo incremento en salóns de xogos, casinos e apostas deportivas presenciais. Doutra banda, mentres que a Once mantivo estable a súa rede de vendedores, Selae levou a cabo un axuste nos seus servizos centrais, aínda que aumentou os vendedores en case 3.000. En total, entre privado e público, 86.761 persoas dependen do sector, chegando a case 160.000 que se benefician de forma indirecta.
