Olaxonmario foi recoñecido como mellor 'youtubeiro' na quinta edición destes galardóns, cuxa gala se celebrou este venres en Ames presentada por Tanxugueiras. Así, Olaxonmario levou dous do cinco premios dos V Premios Youtubeiras aos que aspiraba, pois tamén gañou o da categoría de Vídeo.
Os premios, organizados polos servizos de normalización lingüística dos concellos da Baña, Ames, O Grove, Moaña, Negreira, Pontevedra, Ribadeo, Rianxo, Santiago e Teo; das universidades da Coruña, Santiago e Vigo, e da Deputación da Coruña, concederon a Olaxonmario, dous dos cinco galardóns aos que aspiraba: Youtubeira e Vídeo.
Do seu vídeo galardoado, Por que é que non entendo o Portugués? Co Portuguese With Leo, sinalouse que se trataba dun "dos vídeos en galego non musicais que está a ter maior repercusión dende o seu lanzamento en Youtube".
Na categoría de Canle, a gañadora foi O Son das Ideas. "O seu contido triunfa por todos os recursos que emprega nos vídeos, pola súa facilidade de explicar temas complexos e a súa creatividade plasmada a través das animacións", apuntou o xurado.
O premio á Calidade Lingüística recoñeceu neste 2021 a Neeumatiko, de quen o xurado puxo en valor o seu "dominio formal tanto na dimensión gramatical coma léxica e fonética".
Pola súa banda, Toxío recolleu o galardón no apartado de Calidade Técnica polo seu uso dos recursos.
