Barneda: "Chegaron a encerrarme nun despacho para preguntarme se me gustaban as mulleres"

Sandra Barneda celebrou a semana do Orgullo Gai no último post do seu blogue I will survive na páxina web de Telecinco. A presentadora de El Debate de Superviventes e integrante de Hable con ellas publicou un artigo en forma de alegato a favor da liberdade sexual e no que narra como foi a súa experiencia de aceptar a súa homosexualidade tanto na esfera privada como na pública e que a súa contorna máis próxima fixese o mesmo.E, todo iso, por mor dunha columna publicada hai uns días no Diario de Ferrol por José Luis Patiño na que se atacaba o colectivo LGBT e que, finalmente, foi retirada pola polémica suscitada."Xamais inventei un noivo, pero é certo que, durante algún tempo, parecía que a miña vida sentimental era un deserto", di no seu blogue. Barneda explica que chegou a sentirse "desgraciada e triste" cando os seus irmáns levaban á casa as súas parellas "e eu era incapaz de dar o paso".A presentadora recorda que foi un proceso "longo e privado" ata vivir a súa homosexualidade libremente na súa vida privada, pero tamén na laboral: "Confeso que me encerraron nun despacho e con autoridade moral preguntáronme: '¿A ti gústanche as mozas?'. Negueime a responder, preguntei de onde viña esa pregunta e descubrín que levaban tempo falando sobre a miña sexualidade ás miñas costas e que iso era motivo de pregunta laboral".Barneda tamén recorda a sensación que tivo cando chegou a traballar despois de que un medio "sacase á luz a miña homosexualidade". "Non podo describilo, chegar á tele e sentir que todo o mundo sabía, sen eu ter a liberdade de dicilo, con quen me ía á cama"."Necesitei moitas noites para aceptarme. Considérome unha sobrevivente, unha máis que desexa amar con liberdade. Saír á rúa e bicarme coa miña moza, pasarlle a man por detrás, quitarlle a migalla de pan na comisura, recibir un bico espontáneo sen sentirme coartada ou exposta", engade a presentadora.