Culpable a muller que tirou o cadáver do seu noivo ao mar en Gran Canaria

A acusada foi condenada a 24 anos de prisión por delitos de asasinato e estafa ante os feitos sucedidos en 2016

Un xurado popular declarou culpable de asasinato á muller que matou á súa parella e escondeu o seu corpo nun bidón para logo arroxalo ao mar en Gran Canaria, así como dos delitos de estafa e apropiación indebida.

O veredicto considera que Sira M.Q.M. asasinou a Daniel Ceballos, con quen mantiña unha relación sentimental. A amiga que a axudou ao traslado do bidón quedou absolta de cargos de encubrimento por falta de probas, segundo o xurado.

Tras a súa morte, a acusada introduciu o corpo da vítima nun bidón e mantívoo durante dous meses no domicilio que ambos compartían no municipio de Telde (Gran Canaria). Posteriormente, trasladouno ás Palmas de Gran Canaria coa axuda dunha amiga, Vicenta S., primeiro á azotea da súa vivenda e logo ao domicilio do pai da acusada. Finalmente, arroxou o bidón ao mar na costa do Confital, nas Palmas de Gran Canaria, o 12 de maio de 2016.

O tribunal tamén considera probados dous delitos de estafa cometidos pola acusada, posibles desencadenamentos dos feitos. A muller vendeu sen o seu consentimento un coche propiedade do falecido e enganouno cun suposto embarazo de xemelgos. Ante a posibilidade de ser descuberta, organizou un plan para acabar coa vida de Daniel Ceballos, segundo o xurado popular.

Logo de matar á súa parella, fíxose pasar polo falecido a través do seu teléfono móbil por mensaxería instantánea durante máis de dous meses para pedir diñeiro á familia del co fin de pagar os supostos gastos que a parella tiña en Madrid, onde se desprazaron para que os xemelgos, con problemas de saúde, fosen atendidos nun centro especializado.

A fiscalía ampliou para Sira M.Q.M a petición de condena coa solicitude de 24 anos de prisión polo delito de asasinato e dous por cada un dos dous delitos de estafa, así como 30 anos de afastamento da familia e unha multa diaria de 10 euros por tres meses por un delito apropiación indebida.

Comentarios