Unha moza foi detida este xoves na Coruña por agredir cunhas tesoiras de 25 centímetros de folla na cabeza a súa nai mentres durmía. Segundo informou a Policía Local, os feitos sucederon de madrugada, pois ás 1.41 horas a Policía recibiu unha chamada de alerta.
Os axentes falaron coa persoa agredida, de 48 anos, quen manifestou que cando se atopaba durmindo no seu domicilio a súa filla entrou na habitación agredíndoa con golpes na cabeza e cunhas tesoiras de 25 centímetros de folla. A muller conseguiu zafarse como puido e saíu da súa casa para refuxiarse nun bar próximo, onde pediu axuda, segundo relata a Policía, e engadiu que a súa filla padecía un certo desequilibro psicolóxico.
Os axentes comprobaron que o camisón que levaba a muller tiña manchas de sangue e avisouse unha ambulancia do 061 que a atendeu no lugar polas feridas na cabeza.
A filla da agredida, mentres, manifestou que tivera unha discusión coa súa nai pola tarde e que lle quería dar un susto mentres durmía, pero que a situación se lle foi das mans. A moza, de 25 anos, foi detida e atendida por persoal sanitario que procedeu ao seu traslado ao Complexo Hospitalario Universitario da Coruña para a súa valoración.
A detida foi custodiada no centro sanitario e despois quedou a disposición xudicial nos calabozos policiais, polo que está a expensas do que resulte da investigación se é denunciada por un delito de violencia no ámbito familiar con resultado de lesións ou un delito de homicidio en grao de tentativa.
