A Garda Civil de Lestedo, en colaboración coa de Vilagarcía, detivo a un veciño de Vedra (A Coruña) e procedeu á investigación dunha arousá, como presuntos autores dun delito de subtracción de vehículo sen intimidación e outro de lesións por roubar un tractor e romperlle ósos do nariz ao propietario.
Segundo informou o Instituto Armado, os feitos sucederon entre Senande-Lambas de Boqueixón e A Gándara-Vedra, onde o detido subtraeu un tractor e un remolque de autocarga ao denunciante. E, posteriormente, tamén lle rompeu varios ósos do nariz tras un forte golpe por recriminarlle a acción.
Tras os feitos, a vítima informou á Garda Civil de que entre o detido e unha muller tíñanlle retidas nunha nave de Vilagarcía de Arousa outro remolque autocargador, unha empacadora e unha sembradora que non lle querían devolver.
Finalmente, tras un rexistro na nave que sinalara a vítima, a Garda Civil puido recuperar a maquinaria subtraída, valorada nuns 160.000 euros, e parte da que figuraba como retida.
