O CAE 112 Galicia rexistrou a última hora deste sábado, sobre as once da noite, a chamada dun particular que indicaba que o seu sobriño saíra a mergullar sobre as 19:00 horas en Punta de Monte Louro, en Muros, e non regresara, e asegurou ademais que o vehículo do desaparecido estaba nese lugar.
Desde o CAE 112 Galicia alertouse a Salvamento Marítimo que activou un dispositivo de busca cun helicóptero e unha embarcación.
Ademais, por terra, o 112 Galicia solicitou a colaboración da Garda Civil e dos efectivos do GES e de Protección Civil de Muros.
Posto en marcha o operativo, efectivos do GES que, nese momento acompañaban á familia, ouviron rumores que o home fora rescatado e trasladado ao Hospital do Barbanza.
Así, postos en comunicación co 112 Galicia, os servizos sanitarios confirmaron que o home fora evacuado nunha ambulancia, tras recibir o aviso dun particular que lles alertou dunha persoa con neopreno na praia de Queiruga.
Así mesmo, comunicaron que dita persoa estaba consciente e que, el mesmo, díxolles que levaba no mar desde as 18:00 horas desa tarde.
A desaparición dun mergullador en Muros mantivo en alerta aos servizos de urxencia
Un particular avisou de que o home foi evacuado en ambulancia cando xa se activara un dispositivo de busca ante as preocupacións da familia
