A menor de 20 meses que morreu o pasado mes de novembro tras acudir ao Hospital de Vinaròs (Castelló) cun cadro de vómitos recibiu unha dose "letal" de glicosa por "erro" e "neglixencia" da enfermeira que lla forneceu, segundo manifestou a Efe o avogado da familia da nena.
O letrado citou o contido do informe da comisión de investigación creada pola Conselleria de Sanidade da Generalitat Valenciana sobre este suceso, no que se constata de xeito "incontestable" esta "neglixencia", segundo o avogado Rubén Darío Delgado, que denunciou ante o xulgado a atención recibida pola menor.
A Conselleria de Sanidade declinou comentar o contido do informe porque, segundo manifestaron a Efe fontes deste departamento, atópase baixo investigación xudicial. Segundo o citado avogado, o informe confirma que a menor foi atendida por un médico de urxencias e non por un especialista en pediatría.
Cando a menor empeorou, foi atendida por outro médico de urxencias, e non foi ata que comezaron as convulsións, cando un médico pediatra se ocupou da nena, aínda que xa non se puido evitar o seu falecemento, sempre segundo o relato do avogado, que asegurou que estes detalles quedan recollidos no informe.
A causa da morte, segundo constata o informe, foi a administración dunha dose "letal", excesivamente alta, de glicosa, despois de que a enfermeira administrase por vía intravenosa unha cantidade que non se correspondía coa que indicou o facultativo médico por escrito, e ademais, a dose que esta enfermeira apuntou tampouco era a que indicou o doutor. Segundo Delgado Ortiz, a enfermeira "non só administrou mal a dose, senón que tamén apuntou mal a orde do médico".
O avogado recordou que na causa que instrúe o Xulgado de Instrución número 4 de Vinaròs figuran como investigados por un presunto delito de homicidio por imprudencia profesional grave dúas enfermeiras e catro médicos.
O letrado quixo trasladar o agradecemento ao xuíz instrutor do proceso pola "dedicación" a este asunto para que se resolva coa "máxima rapidez" posible e evitar o sufrimento tanto da familia da menor como das persoas que figuran como investigadas. Actualmente estase finalizando a instrución deste caso a falta da práctica dunha proba proposta pola defensa e dunha declaración, polo que a data para a celebración do xuízo oral podería ser fixada en breve.
