Achan o corpo do montañeiro vasco desaparecido nos Pireneos

O cadáver foi achado por outros compañeiros e presentaba politraumatismos 

O corpo sen vida do montañeiro vasco que desaparecera o sábado no Pirineo francés foi atopado este venres, informou a Efe un portavoz da Compañía Republicana de Seguridade (CRS) da localidade de Gavarnié, encargada da súa procura.

O corpo presentaba politraumatismos e foi achado cara ás 17.30 (15.30 GMT) por outros montañeiros, que deron a voz de alarma.

A familia xa foi advertida, engadiu o portavoz, que indicou que, como é habitual nestes casos, abriuse unha investigación para esclarecer os feitos.

Rafael Castaños, biscaíño de 46 anos e domiciliado en Santurtzi, partiu o sábado ás 08.00 (06.00 GMT) do aparcadoiro da Fruitière, a 1.371 metros de altitude.

Tiña previsto durmir no refuxio de Estom, situado a 1.804 metros de altitude, e regresar o domingo, pero non pasou a noite alí e a familia alertou aos servizos franceses este pasado luns ao non ter noticias.

O montañeiro ía só, e segundo a familia, tiña experiencia na montaña. Segundo a CRS, a ruta elixida non está moi frecuentada, mestura tramos de sendeirismo con outros de escalada alpina e necesita "certa técnica".