O avó materno do bebé supostamente maltratado polos seus proxenitores na Coruña acusou este mércores ao pai de facer "dano" ao neno. "Penso que non se caeu, senón que lle pegou alguén", relatou na segunda sesión do xuízo que se segue na Audiencia Provincial contra unha parella acusada de maltratar ao seu fillo cando apenas tiña uns meses de vida, ata deixalo cego e epiléptico. O home relatou que nalgunha ocasión viu como o procesado collía ao pequeno polos pés e o zarandeaba "dun xeito arriscado" mentres dicía que era "algo que se facía" en Senegal, o seu país de orixe.
"Eu creo realmente que o que fixo dano ao neno foi el", afirmou o avó materno, que agora está a cargo do seu neto. Ante o tribunal, chegou a asegurar que o pai do cativo manifestaba unha "agresividade escondida" e acusouno de agredir tamén á muller. "Eu o que sei é que a miña filla foi maltratada sistematicamente antes e despois", declarou. Con todo, a irmá da acusada dixo que esta nunca lle manifestara que estivese a ser maltratada polo seu marido. A Fiscalía pide penas de 24 anos de prisión para cada un deles.
O avó asegura que o acusado zarandeaba ao pequeno "dun xeito arriscado" e que o trato da nai "era exquisito"
Fronte á versión do avó materno, que asegurou que o trato da súa filla cara o neno "é exquisito", outra das testemuñas ofreceu ante a Audiencia unha perspectiva moi distinta. Así, a traballadora social que realizou un informe aos pais indicou que os acusados "nunca se culpabilizaron" entre eles do que lle ocorreu ao bebé, pero que nunha primeira entrevista o pai comentou que a muller tiña "episodios de furia e tiraba cousas ao chan". Un comportamento que ela mesma "admitiu", apuntou esta profesional na súa declaración, para a continuación recordar que a proxenitora fora diagnosticada cun "trastorno límite de personalidade", o que podería xustificar este tipo de comportamentos. Con todo, tanto o pai como a irmá da procesada negaron tales actitudes agresivas.
Durante a estancia do menor no hospital, a traballadora social apreciou que o contacto físico co neno "era máis evidente" no pai, que era "máis protector". É indicou que era el quen mostraba interese por saber que é o que lle ocorreu ao seu fillo.
PERITO. Na sesión deste mércores tamén ofreceu o seu testemuño un médico do hospital Teresa Herrera –centro no que permaneceu ingresado o menor–, quen rexeitou que existisen datos previos que apuntasen a que o neno ía sufrir epilepsia e asociouno a unha secuela.
Segundo o escrito da Fiscalía, entre decembro de 2011 e o 3 de xaneiro de 2012 os acusados golpearon ao seu fillo contra algún obxecto ou superficie dura, o que lle provocou fracturas e hematomas. Así quedaron secuelas como cegueira bilateral completa, epilepsia secundaria e atraso no desenvolvemento psicomotor, entre outras. Ademais das penas de cárcere, o ministerio público solicita unha indemnización de 560.000 euros. O xuízo está previsto que termine este xoves.
