O xulgado de primeira instancia e instrución 5 de Vinaròs, en funcións de garda, decretou prisión provisional, comunicada e sen fianza para o home de 47 anos detido este martes nesta localidade por matar a súa nai, de 83, e estará en seguimento por especialistas en psiquiatría. Segundo informou o Tribunal Superior de Justicia de la Comunitat Valenciana, o arrestado está a ser investigado nunha causa aberta por un delito de homicidio, sen prexuízo dunha posterior cualificación xurídica máis grave (asasinato) en función do desenvolvemento da investigación.
A xuíza acordou tamén que o sospeitoso sexa sometido a observación e seguimento por parte de especialistas en psiquiatría do centro penal ao que sexa trasladado. O detido pasara este mediodía a disposición xudicial tras ser detido por axentes da Garda Civil logo de acabar presuntamente coa vida da súa nai nun suceso ocorrido sobre as 13 horas do martes nos arredores desa localidade da comarca castellonenca do Baix Maestrat.
A Garda Civil abriu unha investigación para esclarecer as causas do suceso e instruíu dilixencias que foron entregadas ao xulgado xunto co detido.
