Seis persoas resultaron feridas este sábado pola tarde en senllos accidentes de tráfico rexistrados en Santiago e Coristanco.
O primeiro, unha colisión entre dous coches, deixou catro feridos na rúa Amio, preto da feira de gando da capital galega. Ocorreu ao redor das 15.30 horas e foi mobilizado persoal de Urxencias Médicas, dos Bombeiros de Santiago, de Protección Civil e da Policía Local.
O segundo rexistrouse no municipio tamén coruñés de Coristanco. Dúas persoas resultaron feridas nunha colisión entre dous vehículos. Segundo se lle indicou ao 112, o seu estado non reviste gravidade.
O accidente ocorreu no quilómetro 9 da AC-421, á altura do lugar de Vilaverde, na parroquia de Cereo. Unha persoa particular chamou ao 112 Galicia minutos logo das 17.00 horas para informar o sinistro.
Desde o Centro de Atención ás Emerxencias do 112 informouse a Urxencias Médicas e aos Bombeiros de Carballo. Tamén se alertou ao GES de Ponteceso, a Protección Civil e á Garda Civil de Tráfico.
