Estamos a pasar uns meses complicados desde que en marzo chegou ao noso país a temida pandemia sanitaria provocada pola covid-19. Logo dos meses de verán nos que gozamos dunha nova normalidade agora, chegado o outono, os contaxios volven subir e chegan de novo moitas medidas restritivas, entre elas os aforamentos reducidos e a limitación dos grupos a cinco persoas. A concelleira de Promoción Económica e Turismo, Yoya Blanco, explícanos como afecta a cidade.
Como pode valorar os meses de verán nos que ademais a súa concellaría, a través da firma municipal Visit-Pontevedra, puxo en marcha a estratexia #vuelvoaPontevedra para incentivar o turismo de proximidade?
Nós facemos sempre unha especie de estatística a través da Oficina de Turismo para ter un control da xente que pasa a pedir información ou pola que fai visitas guiadas e é verdade que este ano hai unha baixada de cifras comparado co ano pasado, especialmente en xullo, no que constatamos só un 20% (do total rexistrado en xullo de 2019) de visitas e de xente que se achegaba á oficina, pero en agosto a recuperación foi moi importante. Insisto en que as cifras foron menores en xeral, pero as do mes de agosto non son cifras moi inferiores ás do mes de agosto do 2019, así que por esa parte si que estamos contentos. Hai unha característica que resume o que pasa este ano de pandemia, que é que o turismo foi maioritariamente de carácter nacional. Houbo moi pouco turismo internacional, así que a campaña #vuelvoaPontevedra, pese as restricións, pese á pandemia, funcionou.
Queremos desestacionalizar o turismo cando pasen estas restricións, algo que agora é complicado
Non pensa, como outros, que animaraos turistas a visitar a cidade pode ser contraproducente?
A nosa premisa, como non podía ser doutro xeito, e como o resto de administracións, é dar prioridade absoluta á seguridade e á sanidade, pero temos que seguir traballando, tamén pensando no ano 2021 que é o ano do Xacobeo, esperando que a situación sanitaria sexa moito mellor. Sabemos que o turismo, sobre todo logo das novas restricións en Galicia, vai baixar substancialmente. Trasladábanme hai uns días desde a Oficina de Turismo que está todo bastante parado. Nós temos que seguir traballando no sentido porque non nos podemos esquecer de que hai moitísimos sectores moi golpeados pola pandemia que viven fundamentalmente do turismo, como os aloxamentos, hoteis, hostais, hostalería, especialmente golpeados. Por iso insisto en que temos que traballar para un futuro inmediato e para que todos os turistas que veñan saiban que están nunha cidade segura e que eles mesmos teñen que cumprir todas as medidas de prevención.
¿Como ve o futuro turístico de Pontevedra, e máis agora coas novas restricións, que non sabemos o que poden durar?
En todo este tempo eu quéroo mirar con optimismo pese as restricións e ao momento dificilísimo que estamos a vivir desde o punto de vista sanitario, que evidentemente repercute no campo económico. Pontevedra é unha cidade que vive en gran medida do turismo, é unha cidade para estar e para pasear e que se ve moi prexudicada co baixón do turismo destas épocas. Eu quero mirar o futuro con positividade e optimismo. Creo que temos que seguir traballando para que cando isto pase teñamos feita unha boa estrutura para recibir o turismo. Agora a situación está moi difícil e máis desde esta semana pasada coas novas limitacións.
Miro ao futuro con optimismo a pesar da situación, só podemos traballar para ter todo ben estruturado cando isto mellore
Pensaron algunha outra campaña para animar o outono e inverno que parece duro?
A intención, cando pasen estas restricións tan duras desta tempada, será desestacionalizar o turismo, algo que vai ser moi complicado este ano. Si que é verdade que levabamos traballando nesta liña moito tempo e conseguimos que, como mínimo, as estancias en Pontevedra foran de dúas noites. Isto cambiou radicalmente coa nova situación. A xente vai optar máis por estancias de carácter medio que por estancias de fins de semana e vai gozar destes días en situacións vacacionais, sobre todo cando o contexto sanitario mellore. O turismo nacional é básico para nós, como pasou este verán. Hai moitas comunidades autónomas que, como Madrid, nestes momentos pensan sempre en Galicia e Pontevedra como un dos seus destinos preferidos, e que debido a súa situación extrema, aparcaron o turismo.
¿Que cre que pasará no Nadal?
Estamos a traballar xa, sobre todo desde a concellaría de Promoción Económica e Turismo, como todos os anos, para promocionar o comercio e que, dalgún xeito, tamén promocione o resto de sectores e repercuta polo tanto no turismo. Será un Nadal diferente. Estamos a espera. Temos moitos temas e actuacións para facer que están no aire á espera das medidas sexan menos restritivas. Será un Nadal distinto, pero haberá Nadal, máis ilusionante e cheo de maxia ca nunca. E é evidente que, pese ao tirón de toda a zona da cidade e das Rías Baixas, as cifras de turismo baixarán substancialmente, porque este turismo nacional ten agora mesmo moi complicado viaxar e nós temos que basearnos no que di o Goberno central. Temos o deber de seguir traballando polo que poida pasar, porque isto mellore. Aínda que sabemos que isto será complicado, pero iso non nos pode facer baixar os brazos e seguir traballando duro polo que está por vir.
