Un accidente de tráfico, entre tres coches e unha moto, rexistrado en Vigo nas últimas horas, saldouse con dúas persoas feridas, segundo informou o CIAE 112 Galicia.
O sinistro tivo lugar cara ás 22.30 horas deste mércores, na Estrada de Camposancos, na parroquia de San Miguel de Oia. Un particular contactou con Urxencias para informar dun accidente no que estaban implicados catro vehículos: tres coches e unha moto.
O CIAE puxo os feitos en coñecemento de Urxencias Sanitarias-061, Garda Civil de Tráfico e os servizos de mantemento da estrada. Tras a intervención, os efectivos sanitarios confirmaron que dúas persoas feridas foran evacuadas a un centro hospitalario.
Outro sinistro na Avenida de Castrelos
Por outra banda, o 112 Galicia tamén informou doutro sinistro na cidade olívica, na Avenida de Castrelos cara á parroquia de Valadares.
Segundo sinalaron fontes de Urxencias, o accidente ocorreu sobre as 21.10 horas deste mércores, cando se produciu unha colisión entre dous vehículos. No operativo participaron Urxencias Sanitarias-061 e Policía Local, e 6 persoas tiveron que ser atendidas polos profesionais sanitarios.
