Un home, acusado dun delito contra a saúde pública, por vender heroína, e dun delito de atentado, en concurso cun de lesións, aceptou penas que suman 4 anos de prisión e o pago dunha multa de case 51.000 euros, nunha vista de conformidade que tivo lugar na sección quinta da Audiencia Provincial de Pontevedra, con sede en Vigo.
O procesado, Enrique A.C., recoñeceu os feitos que lle atribúe a Fiscalía e, tras un acordo, aceptou 3 anos de cárcere por un delito contra a saúde pública e o pago dunha multa de case 51.000 euros; así mesmo, polo delito de atentado aceptou 9 meses de prisión; e polo de lesións, aceptou outros 3 meses de cárcere.
Segundo o escrito de acusación pública, Enrique A.C. estaba a ser vixiado pola Policía, ante a sospeita de que se dedicaba á venda de heroína, e os axentes comprobaron como realizaba varias transaccións de droga en operativos de vixilancia entre primeiros de xuño e primeiros de xullo do ano 2020.
O sospeitoso foi interceptado pola Policía o 9 de xullo para proceder á súa detención. Nese momento circulaba en motocicleta e, ante a presenza dos axentes, acelerou o vehículo para eludir á Policía, embistiendo a un dos funcionarios, que sufriu varias contusións, unha escordadura cervical e a rotura da pantalla do seu teléfono.
DETENCIÓN E REXISTRO. Finalmente, foi detido e sometido a un cacheo, no que se lle interviñeron case 5 gramos de heroína, un anaco de haxix, 45 euros e un teléfono móbil.
Por outra banda, no rexistro realizado no seu domicilio, atopouse case medio quilo de heroína oculta no seu vehículo, así como varias papelinas máis, seis anacos de haxix, unha báscula e 17.580 euros.
Aínda que inicialmente a Fiscalía pedía para Enrique A.C. penas que sumaban 10 anos de prisión, ao final, tras o acordo de conformidade, o acusado (que está en prisión preventiva desde o seu arresto) aceptou 4 anos de cárcere. Ademais das penas privativas de liberdade e do pago da multa, o procesado deberá indemnizar ao axente ferido para sufragar o custo de reparar o seu teléfono.
Na sentenza, que xa foi declarada firme, o tribunal aplicou as atenuantes de drogadicción e reparación do dano, xa que o acusado consignou xa 1.692 euros para indemnizar ao axente polas lesións.
