A Policía Nacional detivo a un home de 44 anos por atentar contra un funcionario público ao, presuntamente, ameazar a un pediatra que lle requisou unha navalla que o seu fillo ocultaba baixo a almofada da súa habitación no hospital Álvaro Cunqueiro de Vigo, onde estaba ingresado o menor.
O pasado 26 de xaneiro, o médico que efectuaba a habitual rolda de visitas na área de pediatría entrou na habitación do menor e descubriu que ocultaba unha navalla baixo a almofada, segundo informa a Policía Nacional.
Cando o médico lle retirou a navalla ao paciente e informou, tamén ao pai, de que a depositaría no servizo de seguridade, ambos comezaron a ameazalo e a esixirlle a súa devolución de forma agresiva, polo que fuxiu, e acabaron perseguíndoo polos corredores do hospital.
O médico recibiu auxilio dun axente da Garda Civil fóra de servizo que se atopaba nunha habitación próxima.
Posteriormente, axentes da Policía Nacional acudiron ao centro e nun cacheo preventivo de seguridade ao pai do paciente acharon un coitelo de grandes dimensións, tipo puñal.
A continuación, o paciente e o seu pai solicitaron a alta médica voluntaria, que o servizo médico tramitou. Os axentes acompañaron a ambos ata o aparcadoiro do hospital e no vehículo do pai localizaron outro coitelo oculto no interior do coche, que tamén requisaron e notificáronlle unha acta de proposta de sanción.
