O Tribunal Superior de Xustiza de Galicia (TSXG) estimou os recursos de apelación interpostos por Fiscalía e acusación particular e anulou a sentenza que absolveu un pai acusado de abusar sexualmente da súa filla de 5 anos, alegando que non se puido valorar o testemuño da menor porque a gravación que o recollía presentaba fallos técnicos.
A sección quinta da Audiencia Provincial de Pontevedra, con sede en Vigo, ditou sentenza en outubro do ano pasado absolvendo este pai do delito de abusos sexuais, ao entender que a principal proba de cargo, o testemuño da menor, non se podía valorar, posto que a gravación (unha proba anticipada, para evitar que a nena tivese que comparecer na vista) era inaudible e había dificultades para unha correcta visualización.
Agora o alto tribunal galego estimou os recursos das acusacións porque entende que a Audiencia xa debía ser coñecedora das condicións da gravación e puido solicitar asistencia técnica ou suspendido o xuízo para emendar os problemas. En lugar diso, acordou absolver o acusado por non poder valorar esa proba e non tivo en conta a transcrición do testemuño da nena.
A Audiencia non tivo en conta a transcrición do testemuño da menor
Respecto diso, o TSXG concluíu que se produciu unha "indefensión" das acusacións que, durante o acto do xuízo, acolléronse á transcrición das palabras da menor, un documento que debería ser tido en conta polo tribunal. A Audiencia "denegou á defensa a declaración da menor, proxectou a gravación das súas declaracións antes do xuízo e considerouna defectuosa visualmente e inaudible", recordan os maxistrados.
Así mesmo, sinalan que se a Audiencia, ante as deficiencias da gravación, opta por continuar o xuízo, "o devir do plenario e a sentenza deben de ser coherentes coa admisión da proba anticipada que se aceptou como sustitutiva da comparecencia persoal da menor que é presunta vítima e da súa irmá".
Por todo iso, o TSXG acordou estimar os recursos e anular a sentenza absolutoria, de maneira que a sección quinta da Audiencia de Pontevedra deberá emitir unha nova resolución "na que se valoren as probas practicadas máis aló dos defectos técnicos subliñados na sentenza ditada, esencialmente con relación á menor e a súa irmá".
