O Xulgado de Instrución número oito de Vigo arquivou a causa contra o xefe da Policía Autonómica da localidade, Antonio T.R., aberta por mor da querela presentada por unha axente por supostos delitos contra a integridade moral e de acoso sexual e laboral no contexto dunha relación profesional xerárquica.
Segundo confirmaron fontes do Tribunal Superior de Xustiza de Galicia (TSXG) a Europa Press, o titular do xulgado decretou nun auto o sobresemento provisional e arquivo da causa ao entender que, "tras escoitar as declaracións das testemuñas e examinar a documentación achegada, non quedou acreditado o acoso sexual denunciado por unha subordinada".
De acordo con fontes próximas ao caso, a muller presentou a querela a finais do pasado ano para denunciar "diversos comentarios improcedentes nun contexto laboral" por parte do seu superior, así como "certas condutas laborais que denotan a existencia dun acoso laboral ('mobbing') e discriminación respecto doutros compañeiros".
Tras iso, a propia denunciante, o xefe policial e outras testemuñas acudiron a declarar ante o xulgado. Por estes feitos, a muller, que é membro do Corpo Nacional de Policía aínda que estaba destinada a unha unidade adscrita á Policía Autonómica, estivo de baixa varios meses e posteriormente decidiu pedir un cambio de destino, á comisaría da Policía Nacional de Vigo-Redondela.
